खासगी प्रवासी वाहतूक कारने सायकलस्वार शालेय विद्यार्थ्याला पाठीमागून जोराची धडक दिल्यामुळे तो जागीच ठार झाल्याची घटना बुधवारी सकाळी वैजापूर - गंगापूर रस्त्यावरील बाजाठाण फाटा परिसरात घडली . आनंद अशोक जगताप ( १४ , रा . शिरसगाव , ता . वैजापूर ) असे मृत विद्यार्थ्याचे नाव आहे .   याप्रकरणी वीरगाव ठाण्यात अभिजित नरहरी दहिवाळ ( रा . औरंगाबाद ) या कार चालकाविरोधात निष्काळजीपणे वाहन चालवण्याचा गुन्हा दाखल केला . शिरसगावहून महालगावच्या न्यू हायस्कूलमध्ये नववीत शिकणारा आनंद जगताप हा सायकलवरून जात होता . बुधवारी सकाळी शाळेत पोहोचण्यासाठी अवघे १ किमी अंतर शिल्लक असतानाच पाठीमागून कारने ( एमएच ११ सीजी ९ ८ ९९ ) त्याच्या सायकलला जोराची धडक दिली . यामुळे आनंद जागीच ठार झाला . वाहनचालकाने जखमी विद्यार्थ्याला त्याच वाहनातून वैजापूर उपजिल्हा रुग्णालयात उपचारार्थ दाखल करण्याची तत्परता दाखवली होती . मात्र , वैद्यकीय अधिकाऱ्यांनी तपासून तो मृत झाल्याचे घोषित केले