চৰাইদেউ জিলা উপায়ুক্ত কাৰ্যালয়ৰ সভাকক্ষত অসম -অৰুণাচল প্ৰদেশ সীমা বিবাদ সন্দৰ্ভত দুয়োখন ৰাজ্যৰ মন্ত্ৰী, বিধায়ক তথা প্ৰশাসনিক বিষয়াসকলৰ উপস্থিতিত অনুষ্ঠিত হোৱা বৈঠকত কি সিদ্ধান্ত গ্ৰহণ কৰা হ'ল সেই কথা জনালে অসম চৰকাৰৰ মন্ত্ৰী বিমল বড়াই। নামচাই চুক্তি অনুসৰি দুয়োখন ৰাজ্যৰ সীমা বিবাদ নিষ্পত্তিৰ বাবে কেনেধৰণৰ পদক্ষেপ গ্ৰহণ কৰা হৈছে সেই কথাও জনালে মন্ত্ৰী গৰাকীয়ে। আজি অনুষ্ঠিত হোৱা বৈঠকত অসম চৰকাৰৰ মন্ত্ৰীদ্বয় বিমল বড়া, যোগেন মহন, সোণাৰি সমষ্টিৰ বিধায়ক ধৰ্মেশ্বৰ কোঁৱৰৰ লগতে অৰুণাচল প্ৰদেশৰ মন্ত্ৰী হনচুম নাংডাম, কাণুবাৰীৰ বিধায়ক গ্ৰেবিয়েল ডি ৱাংচুৰ লগতে চৰাইদেউ আৰু অৰুণাচল প্ৰদেশৰ কাণুবাৰী জিলাৰ প্ৰশাসনিক বিষয়াসকল উপস্থিত থাকে। উল্লেখ্য যে ইয়াৰ পূৰ্বে ২৬ আগষ্টত অৰুণাচল প্ৰদেশৰ কাণুবাৰী আৰু ৮ চেপ্তেম্বৰত অসমৰ চৰাইপুঙত দুয়োখন ৰাজ্যৰ দ্বিপাক্ষিক বৈঠক অনুষ্ঠিত হৈছিল।