વિધાનસભા સામાન્ય ચૂંટણી-૨૦૨૨ અંતર્ગત પાલનપુર ખાતે કલેકટરશ્રી આનંદ પટેલના અધ્યક્ષસ્થાને નોડલ ઓફિસરની બેઠક યોજાઇ..

ચૂંટણી મુક્ત, ન્યાયી અને શાંતિપૂર્ણ વાતાવરણમાં યોજાય તે માટે બનાસકાંઠા જિલ્લા ચૂંટણી અધિકારીશ્રી દ્વારા ૧૮ જેટલાં નોડલ ઓફિસરોની નિમણુંક કરાઇ..

(માહિતી બ્યુરો, પાલનપુર)

વિધાનસભા સામાન્ય ચૂંટણી-૨૦૨૨ અંતર્ગત પાલનપુર ખાતે જિલ્લા ચૂંટણી અધિકારી અને કલેકટરશ્રી આનંદ પટેલના અધ્યક્ષસ્થાને ચૂંટણીની વિવિધ કામગીરી માટે નિમાયેલ નોડલ ઓફિસરોની બેઠક યોજાઇ હતી. વિધાનસભા સામાન્ય ચૂંટણીની પૂર્વ તૈયારીઓ તથા આ ચૂંટણી મુક્ત, ન્યાયી અને શાંતિપૂર્ણ વાતાવરણમાં યોજાય તે માટે જિલ્લા ચૂંટણી અધિકારીશ્રી, બનાસકાંઠા દ્વારા ૧૮ જેટલાં નોડલ ઓફિસરોની નિમણુંક કરવામાં આવેલી છે. આ નોડલ ઓફિસરોએ કરવાની થતી કામગીરી તે અંગે જિલ્લા ચૂંટણી અધિકારીશ્રી દ્વારા વિગતવાર માર્ગદર્શન આપવામાં આવ્યું હતું. 

    આ બેઠકમાં ચૂંટણી ખર્ચ નિયંત્રણ અને ખર્ચ નિયંત્રણ માટે નિમાયેલા અધિકારીઓ, કર્મચારીઓને તાલીમ આપવી, ચૂંટણી માટે સ્ટાફ પુરો પાડવો, ઇવીએમ યોગ્ય જગ્યાએ સુરક્ષિત રાખવા, મતદાન/ તાલીમ માટે સમયસર રૂટ મુજબ વાહનો પહોંચાડવા, ચૂંટણી બાબતે જરૂરી મુજબના ફોર્મ, સ્ટેશનરી અન્ય સામગ્રી મેળવવી, અધિકારીઓ, ઉમેદવારો, રાજકીય પક્ષો, મિડીયા વગેરે માટે ઇલેકશન કમિશન ઓફ ઇન્ડિયા દ્વારા આદર્શ આચારસંહિતને લગતી સુચનાઓનું પાલન અને અમલીકરણ કરાવવું, ચૂંટણી પંચ દ્વારા નિમણુંક થનાર જનરલ ઓબ્ઝર્વર, ખર્ચ ઓબ્ઝર્વર, પોલીસ ઓબ્ઝર્વરના આગમન, રોકાણ સંબંધિ વ્યવસ્થા, ચૂંટણી પંચની પ્રવર્તમાન સુચનાઓ અનુસાર કાયદો અને વ્યવસ્થાની તમામ પ્રકારની કામગીરી, બેલેટ પેપર, ડમી બેલેટ, બ્રેઇલ બેલેટ પ્રુફ એપ્રુવ કરાવવા તથા છાપકામ, ચૂંટણી પંચની સુચનાઓ અનુસાર બ્રીફીંગ તેમજ પ્રેસનોટ, જરૂરીયાત મુજબ સોફ્ટવેર તેમજ હાર્ડવેરની જ્યાં જરૂર પડે ત્યાં વ્યવસ્થા કરવી, ચૂંટણીલક્ષી ફરીયાદોના નિકાલ માટે હેલ્પલાઇન નં. ૧૯૫૦ તથા PGR સીસ્ટમના અસરકારક અમલીકરણ માટે તાલીમ આપવી, ડીસ્ટ્રીક્ટ કોમ્યુનિકેશન પ્લા ન તૈયાર કરાવવો, સ્વીપની કામગીરી, અક્ષમ મતદારોને વિશેષ સુવિધા પુરી પાડવી, સ્થળાંતરીત મતદારો શોધવા અને મતદાનના દિવસે મતદાન કરાવવા સહિતના મુદ્દાઓની વિસ્તૃત ચર્ચા કરવામાં આવી હતી. 

            આ બેઠકમાં જિલ્લા વિકાસ અધિકારીશ્રી સ્વપ્નિલ ખરે, પોલીસ અધિક્ષકશ્રી અક્ષયરાજ મકવાણા, નિવાસી અધિક કલેકટરશ્રી રીટાબેન પંડ્યા, નાયબ જિલ્લા ચૂંટણી અધિકારીશ્રી યોગીરાજસિંહ ગોહિલ સહિત નોડલ ઓફિસરશ્રીઓ ઉપસ્થિત રહ્યા હતા.