শনিবাৰে দেশত আৰম্ভ হ’ল অতি দ্ৰুতগতিসম্পন্ন ৫জি মোবাইল সেৱা৷ প্ৰধানমন্ত্ৰী নৰেন্দ্ৰ মোদীয়ে ইণ্ডিয়ান মোবাইল কংগ্ৰেছৰ এটা অনুষ্ঠানত ৫জি মোবাইল সেৱা উদ্বোধন কৰে৷ দেশৰ তিনিটা আগশাৰীৰ ‘টেলিকম ছাৰ্ভিচ প্ৰভাইডাৰ’ জিঅ’, এয়াৰটেল আৰু ভ’ডাফোন-আইডিআই দেশৰ আঠখন চহৰত প্ৰাৰম্ভিভাৱে এই ৫জি মোবাইল সেৱা আগবঢ়াব৷ কিছুদিনৰ ভিতৰতে এই সেৱা লাভ কৰিব দেশৰ মুঠ ১৩ খন চহৰে৷ সেইকেইখন চহৰ হৈছে দিল্লী, কলকাতা, চেন্নাই, মুম্বাই, আহমেদাবাদ, বাংগালুৰু, চণ্ডীগড়, গান্ধীনগৰ, গুৰুগ্ৰাম, হায়দৰাবাদ, জামনগৰ, লক্ষ্ণৌ আৰু পুনে৷ ৰিলায়েন্সৰ অধ্যক্ষ মুকেশ আম্বানীয়ে জনোৱা অনুসৰি জিঅ’ই ২০২৩ চনৰ ডিচেম্বৰৰ ভিতৰত দেশৰ প্ৰতিখন গাঁও আৰু চহৰত ৫জি মোবাইল সেৱা সংযোগ কৰিব৷ এয়াৰটেলে প্তজি মোবাইল সেৱা ২০২৪ চনৰ মাৰ্চৰ ভিতৰত সমগ্ৰ দেশত দিব বুলি অধ্যক্ষ সুনীল মিট্টালে প্ৰতিশ্ৰতি দিছে৷ প্ৰাৰম্ভিকভাৱে ৮ খন আৰু কিছুদিনৰ ভিতৰতে ১৩ খন চহৰত ৫জি মোবাইল সেৱাৰ সংযোগ দিলেও চহৰৰ প্ৰতিটো অঞ্চলতে এই সেৱা লাভ কৰাটো সম্ভৱ নহ’ব৷ পৰ্যায়ক্ৰমে সকলো গ্ৰাহকে ৫জি মোবাইল সেৱাৰ সুুবিধা লাভ কৰিব পাৰিব৷ দেশৰ মুঠ ১৩ খন চহৰক ৫জি মোবাইল সেৱা দিলেও উত্তৰ পূৰ্বাঞ্চলৰ কোনো এখন চহৰকে প্ৰাৰম্ভিক তালিকাত অন্তৰ্ভুক্ত কৰা নহ’ল৷ ইয়াৰ বিপৰীতে প্ৰধানমন্ত্ৰীৰ গৃহৰাজ্য গুজৰাটৰ তিনিখনকৈ চহৰক প্ৰথম পৰ্যায়তে কেন্দ্ৰীয় চৰকাৰে ৫জি মোবাইল সেৱাৰ সুবিধা প্ৰধান কৰিছে৷ ৫জি মোবাইল সেৱা হৈছে অতি দ্ৰুতগতিৰ ইণ্টাৰনেট সেৱা৷ এই সেৱা ব্যৱহাৰ কৰা গ্ৰাহকে তেনেই কম সময়ৰ ভিতৰত যিকোনো ডাঙৰ ফাইল ডাউনলোড কৰিবলৈ সক্ষম হ’ব৷ তদুপৰি ভিডিঅ’ কলিং হ’ব অতিশয় স্বচ্ছ৷ মোবাইলত গেম খেলাসকলৰ বাবে ৫জি মোবাইল সেৱা অতিশয় দ্ৰুতবেগী হোৱাৰ ফলত সুষম হৈ পৰিব৷ ৫জি মোবাইল সেৱাই দেশৰ কৰ্প’ৰেট ক্ষেত্ৰক অতি দ্ৰুতগতিত আগবঢ়াই নিব৷