চাৰি বন্ধুৰ মৰমৰ আপদাৰত আপ্লুত অভিযন্তা কৃষ্ণ পেগুঃ মাজুলী বিদুৎ বিভাগৰ সহকাৰী কাৰ্যবাহী অভিযন্তা কৃষ্ণ পেগুৱে চাকৰি জীৱনৰ পৰা আজি অৱসৰ গ্ৰহণ কৰে। চৰকাৰী নীতি অনুসৰি অৱসৰ গ্ৰহণ কৰা অভিযন্তা গৰাকীক চাকৰি জীৱনৰ শেষ সন্ধ্যা বিদায় সম্বৰ্দ্ধনা জনোৱাৰ লগতে মাজুলীক সন্মুখৰ পৰা নেতৃত্ব বহন কৰি সমাজৰ উন্নয়নৰ হকে আত্মনিয়োগ কৰিবলৈ সাহস আৰু অনুপ্ৰেৰণা যোগায় ক্ৰমে উজনি মাজুলী খেৰকটীয়া মহাবিদ্যালয়ৰ অৰ্থনীতি বিভাগৰ মুৰব্বী অধ্যাপক ড° উপেন বৰা, ৰতনপুৰ মিৰি একাডেমীৰ প্ৰধান শিক্ষক বিপুল খনিকৰ, বৰবিল হাইস্কুলৰ সহঃ প্ৰধান শিক্ষক সঞ্জীৱ কুমাৰ দত্ত আৰু সমাজকৰ্মী তথা নতুন বজাৰ ব্যৱসায় সন্থাৰ সম্পাদক সুভাষ দেয়ে। চাৰি বন্ধুৱে আজি সন্ধা ৬ বজাত নতুন বজাৰস্থিত খনিকৰ ফাৰ্মাচিত অনুষ্টুপিয়াকৈ আয়োজন কৰা এটি অনুষ্ঠানত বিদায়ী অভিযন্তা গৰাকীক ফুলাম গামোচা আৰু সফুৰাৰে চেনেহ ভৰা সম্বৰ্দ্ধনা জ্ঞাপন কৰে। চাৰি বন্ধুৰ মৰমৰ সম্ভাষণ আৰু চেনেহৰ টোপলা গ্ৰহণ কৰি সদায়েই সমাজৰ হকে কাম কৰি যোৱাৰ প্ৰতিশ্ৰুতি প্ৰদান কৰে কৃষ্ণ পেগুৱে। উল্লেখ্য যে বিদায়ী বিষয়া গৰাকীয়ে মাজুলীৰ বিভিন্ন প্ৰান্তৰ অনুষ্ঠান-প্ৰতিষ্ঠানৰ লগত ওতঃপ্রোতভাবে জড়িত হৈ কাম কৰি অহাৰ লগতে নতুন বজাৰস্থিত উজনি মাজুলী মিলন সংঘ প্ৰতিষ্ঠা, নতুন বজাৰ সন্মিলিত সাংস্কৃতিক মঞ্চ প্ৰতিষ্ঠাত বিশেষ ভূমিকা পালন কৰি এগৰাকী নিষ্ঠাবান সাংস্কৃতিক কৰ্মী হিচাপেও পৰিচয় দি আহিছে।