সাম্প্ৰতিক সময়ত সমগ্ৰ গোলাঘাট জিলাৰ লগতে মৰঙিৰ আটাইতকৈ জ্বলন্ত সমস্যাৰূপে পৰিগণিত হোৱা হাতী-মানুহৰ সংঘাতক কেন্দ্ৰ কৰি দৈগ্ৰোঙৰ নাট্য মন্দিৰত এক বৃহৎ সজাগতামূলক সভা অনুষ্ঠিত হয়৷ নুমলীগড় শোধনাগাৰৰ সহযোগত অসম জাতীয়তাবাদী যুৱ-ছাত্ৰ পৰিষদৰ উদ্যোগত অনুষ্ঠিত সভাখনত আজি অংশগ্ৰহণ কৰে স্থানীয় বিধায়ক বিশ্বজিৎ ফুকন৷ হাতী আৰু মানুহৰ সহাৱস্থানৰ বিকল্প নাই বুলি উল্লেখ কৰি বিধায়ক ফুকনে ৰাইজক জনায় যে হাতী-মানুহৰ সংঘাতটোৰ এক বিজ্ঞানসন্মত সমাধান উলিয়াবলৈ এক বিশেষজ্ঞ সমিতি ইতিমধ্যে গঠন কৰি দিয়া হৈছে আৰু চৰকাৰৰ সংশ্লিষ্ট বিভাগেও ৰাইজৰ সহায়ক হোৱাকৈ বিভিন্ন পথৰ সন্ধান কৰাত ত্ৰুটি ৰখা নাই৷ মানুহে পৰম্পৰাগত কৃষিকৰ্মৰ পৰা কিছু আঁতৰি নেমুটেঙা আদি খেতিৰ কথা চিন্তা কৰিবলৈও খেতিয়কসকলক আহ্বান জনায়৷ অজাযুছাপৰ কেন্দ্ৰীয় সাধাৰণ সম্পাদক পলাশ চাংমায়ো হাতী-মানুহৰ সংঘাত বিষয়ত আলোকপাত কৰি কয় যে বনভূমিৰ সংকোচ আৰু বনৰীয়া হাতীৰ পৰম্পৰাগত পথত শিল-বালিৰ খননেই মূল কাৰণ৷ অসম গণ পৰিষদৰ গোলাঘাট জিলাৰ সভাপতি তথা শিক্ষাবিদ ড° নৃপেন কুমাৰ বৰুৱাই সভাত নিজা বক্তব্য ৰাখি কয় যে পৃথিৱীৰ বৃহত্তম স্থলচৰ জন্তু হাতীৰ ক্ষেত্ৰত থকা দায়িত্বক জীৱশ্ৰেষ্ঠ হিচাপে মানুহে কেতিয়াও অস্বীকাৰ কৰিব নোৱাৰে৷ পৃথিৱীখনক মানুহৰ দৰেই হাতীৰ বাবেও নিৰাপদ কৰি ৰখাৰ দায়িত্ব মানুহৰ৷ নামবৰ-দৈগ্ৰোং বন্যপ্ৰাণী অভয়াৰণ্যৰ অৱশিষ্ট সেউজভূমি ৰক্ষা কৰা আৰু দৈগ্ৰোং, কালিয়নি আদি নদীৰ সুৰক্ষাৰ প্ৰতি বিশেষ গুৰুত্ব আৰোপ দিবলৈ গোলাঘাটৰ বন বিভাগক দাবী জনায় বিশিষ্ট শিক্ষাবিদগৰাকীয়ে৷ সভাত মৰঙি প্ৰেছ ক্লাৱৰ সভিপতি হেমন্ত শইকীয়া, সম্পাদক প্ৰিয়ংদ্বীপ কাকতি, গোলাঘাট বন প্ৰাধিকাৰী বিষয়া সুশীল কুমাৰ ঠাকুৰীয়াও উপস্থিত থাকে৷ ইফালে হাতী-মানুহৰ সংঘাত অধ্যয়নৰ বাবে অনুষ্ঠিত গুৰুত্বপূৰ্ণ সভাখনত কথা দিয়ামতে নুমলীগড় শোধনাগাৰৰ কোনো বিষয়া উপস্থিত নথকাটোৱে উদ্যোক্তাসকলৰ লগতে অসন্তুষ্ট কৰি তুলিছে স্থানীয় ৰাইজকো৷