মাজুলীৰ আগশাৰীৰ মাধ্যমিক শিক্ষা অনুষ্ঠান পীতাম্বৰদেৱ গোস্বামী জ্যেষ্ঠ মাধ্যমিক বিদ্যালয়ৰ ৩৭' সংখ্যক প্ৰতিষ্ঠা দিৱস আজি উদযাপন কৰা হয় । ১৯৮৬ চনৰ ১' আগষ্ট'ত মাজুলীৰ সদৰস্থানত প্ৰতিষ্ঠা লাভ কৰা পীতাম্বৰদেৱ গোস্বামী জ্যেষ্ঠ মাধ্যমিক বিদ্যালয় ( পূৰ্বৰ জুনিয়ৰ কলেজ ) ৰ গৌৰৱোজ্জ্বল প্ৰতিষ্ঠা দিৱস উপলক্ষে আজি পুৱা বিদ্যালয়ৰ চৌহদ পৰিস্কাৰ কৰা হয় । তাৰপিছত শিক্ষক আৰু ছাত্ৰ- ছাত্ৰীসকলে কেইবাটাও গছপুলি ৰোপণ কৰে । ৩৭' সংখ্যক উক্ত প্ৰতিষ্ঠা দিৱস উপলক্ষে বিদ্যালয়ৰ পতাকা উত্তোলন কৰে বিদ্যালয়ৰ অধ্যক্ষ যুগল নাথে । অনুষ্ঠানত পীতাম্বৰদেৱ গোস্বামীৰ প্ৰতিচ্ছবিত বন্তি প্ৰজ্বলন কৰে বিদ্যালয় পৰিচালনা আৰু উন্নয়ন সমিতিৰ উপ- সভানেত্ৰী ইলা শৰ্মা বৰঠাকুৰে । পীতাম্বৰদেৱ গোস্বামীৰ প্ৰতিচ্ছবিত মাল্যাপৰ্ণ কৰে বিদ্যালয়ৰ ছাত্র একতা সভাৰ সভাপতি গজেন বৰাই । ইয়াৰ পাছতে প্ৰতিষ্ঠা দিৱসৰ মুকলি সভা অনুষ্ঠিত হয় । অধ্যক্ষ যুগল নাথৰ পৌৰোহিত্যত অনুষ্ঠিত মুকলি সভাৰ আঁত ধৰে প্ৰৱক্তা যদু কলিতাই । প্ৰতিষ্ঠা দিৱসৰ উক্ত মুকলি সভাত দেশৰ স্বাধীনতা আন্দোলনৰ অন্যতম স্বাধীনতা সংগ্ৰামী, গড়মূৰ সত্ৰৰ সত্ৰাধিকাৰ , " পীতাম্বৰদেৱ গোস্বামীৰ জীৱন আৰু সমাজলৈ অৱদান" সন্দৰ্ভত দীৰ্ঘ সময় বক্তৃতা প্ৰদান কৰে ইলা শৰ্মা বৰঠাকৰে । অনুষ্ঠানত ছাত্র- ছাত্ৰীসকলে বিভিন্ন সাংস্কৃতিক অনুষ্ঠান পৰিৱেশন কৰে । অনুষ্ঠানত শলাগ জ্ঞাপন কৰে ইংৰাজী বিভাগৰ প্ৰৱক্তা বসন্ত হাজৰিকাই ।