নৱৰাত্ৰিৰ প্ৰথমটো দিনটোতে মা কামাখ্যাৰ আশিস ল’লে বলীউডৰ এসময়ৰ মোহময়ী অভিনেত্ৰী মহিমা চৌধুৰীয়ে৷ সোমবাৰে পুৱাই কামাখ্যা ধামত উপস্থিত হয় অভিনেত্ৰী মহিমা চৌধুৰী৷ দুৰ্গা পূজাৰ নৱৰাত্ৰিৰ আৰম্ভণিতে কামাখ্যা মন্দিৰত চাকি-বন্তি জ্বলাই মা কামাখ্যাৰ শ্ৰীচৰণত পূজা কৰে মোহময়ী অভিনেত্ৰীগৰাকীয়ে৷ দুই সহযোগীৰ সৈতে কামাখ্যাত উপস্থিত হোৱা মহিমা চৌধুৰীয়ে শাৰীৰিক অসুস্থতাৰ বাবে সংবাদমাধ্যমক মন্তব্য দিয়াৰ পৰা বিৰত থাকে৷ উল্লেখ্য ‘পৰদেশ’ খ্যাত অভিনেত্ৰী মহিমা চৌধুৰী স্তনৰ কৰ্কট ৰোগত আক্ৰান্ত হৈ আছে৷ কৰ্কটক জয় কৰাৰ বাবেই অভিনেত্ৰী গৰাকীয়ে মা কামাখ্যাৰ আশিস ল’বলৈ নীলাচল পাহাৰত উপস্থিত হোৱা বুলিও শুভাকাংক্ষীসকলৰ মাজত চৰ্চা চলিছে৷ মহিমা চৌধুৰী স্তনৰ কৰ্কটত আক্ৰান্ত হোৱাৰ খবৰ দুমাহ পূৰ্বে প্ৰথম বাৰলৈ ৰাজহুৱা কৰিছিল বলীউডৰ প্ৰখ্যাত অভিনেতা অনুপম খেৰে৷ অনুপম খেৰে এটা ইনষ্টাগ্ৰাম পোষ্টৰ জৰিয়তে অভিনেত্ৰী মহিমা চৌধুৰীৰ সাহস আৰু যুঁজাৰু মনোভাৱক প্ৰশংসা কৰিছিল৷ অনুপম খেৰে মহিমাৰ এটা ভিডিঅ’ ইনষ্টগ্ৰামত প্ৰকাশ কৰি লিখিছিল যে – স্তনৰ কৰ্কট ৰোগত আক্ৰান্ত মহিমাই মনৰ শক্তিয়ে সমগ্ৰ বিশ্বৰ অগণন মহিলাক আশাৰ ৰশ্মি দিব পাৰে৷ অনুপম খেৰে ভিডিঅ’টোৰ শিৰোনাম দিছিল– ‘মহিমা চৌধুৰীৰ সাহস আৰু কৰ্কট ৰোগৰ কাহিনীঃ মই এমাহ আগতে তেওঁক আমেৰিকাৰ পৰা ফোন কৰিছিলোঁ৷ মই তেওঁক মোৰ চলচ্ছিত্ৰ ‘দ্য ছিগনেচাৰ’ত অভিনয় কৰাব বিচাৰিছিলোঁ৷ তেতিয়াই মই গম পাইছিলোঁ যে তেওঁ স্তনৰ কৰ্কট ৰোগত আক্ৰান্ত হৈ আছে৷ কথা পাতি মই উপলব্ধি কৰিছিলোঁ যে তেওঁৰ মনৰ শক্তিয়ে সমগ্ৰ বিশ্বৰ অগণন মহিলাক আশাৰ ৰশ্মি দিব পাৰে৷ তেওঁ বিচাৰিছিল যে মই সকলোকে খবৰটো কওঁ৷ মহিমা, তুমি আমাৰ নায়ক৷ বন্ধুসকল, সকলোৱে তেওঁক মৰম, শুভকামনা আৰু কল্যাণেৰে ভৰাই তোলক৷’ অনুপম খেৰে মহিমাক কৰ্কট ৰোগৰ বিষয়ে কেনেকৈ জানিলে বুলি সোধাত তেওঁ কয়– ‘মোৰ ভিতৰত কোনো লক্ষণ নাছিল৷ মই পৰীক্ষাটো কৰিছিলোঁ৷ যেতিয়া মই চিকিৎসকক লগ পাইছিলোঁ, কৰ্কট ৰোগৰ প্ৰাক-কোষবোৰ দেখাৰ কথা কৈছিল৷ চিকিৎসকসকলে কৈছে যে এইটো ১০০ শতাংশ নিৰাময়যোগ্য৷ যেতিয়া মই কান্দি আছিলোঁ, মোৰ ভনীয়ে মোক বুজাইছিল যে আপুনি কিয় কান্দি আছে৷ মই কৈছিলোঁ, ‘কেন্সাৰ খুব ভয়ংকৰ৷’ যেতিয়া অনুপম খেৰে কৰ্কট ৰোগত আক্ৰান্ত মহিলাসকলৰ বাবে কিবা ক’বলৈ কৈছিল, মহিমাই কৈছিল- ‘‘মই মহিলাসকলৰ পৰা শিকি আছোঁ৷ কেম’ৰ বাবে অহা মহিলা, যি চিকিৎসাৰ বাবে আহে৷ সেইবোৰে মোক স্বাভাৱিক কৰি তোলে৷