চৰাইদেউ জিলাৰ মৰাণত কাইলৈৰ পৰা অনুষ্ঠিত হ’ব অসম জাতীয়তাবাদী যুৱ-ছাত্ৰ পৰিষদৰ আন্তঃজিলা ফুটবল প্ৰতিযোগিতা৷ সংগঠনটোৰ কেন্দ্ৰীয় সমিতিৰ সৌজন্যত চৰাইদেউ জিলা সমিতিয়ে প্ৰতিষ্ঠাপক সভাপতি তথা অসম চৰকাৰৰ প্ৰাক্তন ক্ৰীড়া মন্ত্ৰী প্ৰবীণ কুমাৰ গগৈ সোঁৱৰণীত প্ৰথম বাৰৰ বাবে আয়োজন কৰা প্ৰতিযোগিতাখনত সৰ্বমুঠ ১৫ টা জিলা দলে অংশগ্ৰহণ নিশ্চিত কৰিছে৷ কাইলৈ বিয়লি ২-৩০ বজাত মৰাণ মহাবিদ্যালয় খেলপথাৰত অনুষ্ঠিত হ’ব লগা প্ৰতিযোগিতাৰ উদ্বোধনী খেলখনত মৰাণ জিলা দলে বোকাখাট জিলাৰ সৈতে প্ৰতিদ্বন্দ্বিতাত আগবঢ়াব৷ মৰাণ মহাবিদ্যালয় খেলপথাৰৰ উপৰিও অইল ইণ্ডিয়া খেলপথাৰ, চেপন ৰাজহুৱা খেলপথাৰ আৰু ধমন ৰাজহুৱা খেলপথাৰত অনুষ্ঠিত হ’ব লগা প্ৰতিযোগিতাখনত মৰাণ, বোকাখাট, চৰাইদেউ, শিৱসাগৰ, কাৰ্বি আংলং, যোৰহাট, তেজপুৰ, বজালী, ধেমাজী, গোলাঘাট, নগাঁও, গুৱাহাটী, ডিব্ৰুগড়, তিনিচুকীয়া আৰু উত্তৰ লক্ষিমপুৰ জিলা দলে অংশগ্ৰহণ কৰিছে৷ প্ৰতিযোগিতাৰ চুড়ান্ত বিজয়ী দলটোৱে প্ৰবীণ কুমাৰ গগৈ সোঁৱৰণী বঁটাসহ নগদ ৫০ হাজাৰ টকা আৰু ৰাৰ্ণাচআপ দলে গকুল চেতিয়া সোঁৱৰণী বঁটাসহ নগদ  ৩০ হাজাৰ টকা লাভ কৰিব বুলি খেল পৰিচালনা সমিতিৰ সম্পাদক দিগন্ত গগৈয়ে জানিবলৈ দিছে৷