औरंगाबाद :वाळूज परिसरात दोन महिन्यांत डेंग्यू , कावीळ , मलेरियाने ८ रुग्ण दगावले आहेत . मात्र , शासनदरबारी केवळ ३ रुग्ण दगावल्याची नोंद आहे . तसेच , विविध खासगी रुग्णालयांत ६७ पेक्षा अधिक रुग्ण उपचार घेत आहेत . परंतु , आरोग्य विभागाकडे चार रुग्णांची नोंद आहे . त्यामुळे आरोग्य विभागाचा भोंगळ कारभार असल्याची चर्चा परिसरात सुरू आहे . हाताबाहेर जाणाऱ्या या परिस्थितीचे गांभीर्य आरोग्य विभाग , स्थानिक ग्रामपंचायत व इतर शासकीय यंत्रणेने लक्षात घेण्याची गरज आहे . अन्यथा मृत्यूचा वाढता आकडा कमी करणे शक्य होणार नाही , अशी चिंता नागरिकांतून व्यक्त केली जात आहे . दोन दिवसांपूर्वीच कावीळ व डेंग्यूसदृश आजाराने बजाजनगरातील खासगी शाळेतील दहावीच्या वर्गातील मुलीचा मृत्यू झाला . लग्नानंतर १३ वर्षांनी जन्माला आलेल्या एकुलत्या एक मुलीच्या मृत्यूमुळे तिच्या पालकांवर दुःखाचा डोंगर कोसळला . यासंदर्भात दैनिक दिव्य मराठीने दौलताबाद आरोग्य केंद्रांतर्गत असणाऱ्या बजाजनगर प्राथमिक आरोग्य केंद्राला भेट दिली . त्यावेळी असे निदर्शनास आले की , दोन महिन्यांत डेंग्यूने ३ रुग्णांचा मृत्यू झाला , तर अन्य चौघांवर खासगी रुग्णालयात उपचार सुरू आहेत