সোণাৰিৰ ৰজাপুখুৰী পঞ্চায়তৰ অন্তৰ্গত নকছাৰী-ৰাইডঙ্গীয়া অঞ্চলৰ এগৰাকী সমাজ সচেতন উদীয়মান যুৱকৰ সাফল্যত উৎফুল্লিত হৈ পৰিছে অঞ্চলটোৰ জনসাধাৰণ। নকছাৰী-ৰাইডঙ্গীয়া অঞ্চলৰ যুৱক ৰাজু ৰজকে অসম আৰক্ষীৰ নিযুক্তি পৰীক্ষাত উত্তীৰ্ণ হৈ দৰিদ্ৰ পৰিয়ালটোৰ বিশেষকৈ দৈনিক হাজিৰা কৰি পৰিয়াল পোহপাল দিয়া মাতৃৰ মুখত হাঁহি বিৰিঙাবলৈ সক্ষম হোৱাত সকলোৱে সন্তুষ্টিৰ হাঁহি মাৰিছে। উল্লেখ্য যে কেইবাবছৰ পূৰ্বে পিতৃ স্নেহৰ পৰা বঞ্চিত ৰাজু ৰজকৰ মাতৃ লক্ষী ৰজক এগৰাকী সহজ-সৰল মহিলা। ৬০ বছৰ বয়সতো দিন হাজিৰা কৰি দুবেলা দুমুঠি অৰ্জন কৰাৰ লগতে পুত্ৰ ৰাজুৰো বিভিন্ন খৰচ ব্যয় কৰি আহিছে। তেনে স্থলত সমাজ ভালপোৱা ৰাজু ৰজকে অতি কষ্টৰ লগতে নিজৰ মেধাৰ বলত অসম আৰক্ষীৰ নিযুক্তি পৰীক্ষাত উত্তীৰ্ণ হৈ অঞ্চলটোলৈ গৌৰৱ কঢ়িয়াই অনা পৰিপ্ৰেক্ষিতত আজি ৰজাপুখুৰী পঞ্চায়তৰ সভাপতি দেৱজিৎ হাজৰিকা, অসম চাহ জনজাতি ছাত্ৰ সন্থাৰ ৰজাপুখুৰী উপ শাখাৰ কৰ্মকৰ্তাসকলৰ লগতে স্থানীয় ৰাইজ ৰাজুৰ ঘৰত উপস্থিত হৈ অভিনন্দন জনায়।