કોલકાતા મેટ્રો ઐતિહાસિક પ્રોજેક્ટ પર કામ કરી રહી છે, જે અંતર્ગત દેશમાં પહેલીવાર ગંગા નદીની નીચે મેટ્રો દોડશે. એટલું જ નહીં, જો બધું બરાબર રહ્યું તો આવતા વર્ષે જાન્યુઆરી સુધીમાં દેશને એશિયાનું બીજું સૌથી ઊંડું મેટ્રો સ્ટેશન પણ મળી જશે. આ મહત્વકાંક્ષી પ્રોજેક્ટ હવે અંતિમ તબક્કામાં છે.

ઈસ્ટ-વેસ્ટ મેટ્રો પ્રોજેક્ટ હેઠળ, કોલકાતાના સોલ્ટ લેક સેક્ટર-5થી હાવડા મેદાનને જોડતા મહત્વાકાંક્ષી મેટ્રો પ્રોજેક્ટ હેઠળ મેટ્રો ગંગા (હુગલી) નદીની નીચેથી દોડશે. દેશમાં આ પ્રકારનો આ પ્રથમ મેટ્રો પ્રોજેક્ટ છે. આ સાથે હાવડા શહેરને આવતા વર્ષે જાન્યુઆરી સુધીમાં એશિયાનું બીજું સૌથી ઊંડું મેટ્રો સ્ટેશન મળશે. હાવડા સ્ટેશનની નીચે બની રહેલું મેટ્રો સ્ટેશન ઘણી રીતે ખાસ છે. અધિકારીઓના જણાવ્યા અનુસાર આ મેટ્રો સ્ટેશન જમીનથી 33 મીટર નીચે હશે. નોંધનીય છે કે હાલમાં એશિયાનું સૌથી ઊંડું મેટ્રો સ્ટેશન હોંગકોંગમાં છે, જેની ઊંડાઈ લગભગ 60 મીટર છે. એટલે કે હાવડા સ્ટેશન હોંગકોંગ પછી એશિયાનું બીજું સૌથી ઊંડું મેટ્રો સ્ટેશન હશે.

ઈસ્ટ-વેસ્ટ મેટ્રો પ્રોજેક્ટ 16.55 કિમી લાંબો છે. આ પ્રોજેક્ટનો આશરે 10.81 કિમીનો વિસ્તાર ભૂગર્ભ હશે જ્યારે 5.74 કિમી રેલ લાઇન એલિવેટેડ (ઉપરનો ભાગ) હશે. આ લાઇન પર કુલ 12 સ્ટેશન હશે. આ લાઇન પર હાવડા સ્ટેશન પછીનો માર્ગ કોલકાતાના મહાકરણ (રાઇટર્સ) મેટ્રો સ્ટેશન સુધી પહોંચવા માટે હુગલી નદીની નીચેથી પસાર થશે. આની મદદથી હાવડા અને સિયાલદહ જેવા દેશના સૌથી વ્યસ્ત સ્ટેશનો પણ મેટ્રો સેવા સાથે સીધા જોડાઈ જશે. તેનાથી લાખો મુસાફરોને ઘણો ફાયદો થશે. કેટલાક ભાગોમાં મેટ્રો સેવા શરૂ થઈ ગઈ છે.