নিষিদ্ধ ড্ৰাগছ এতিয়া এক মহামাৰীৰ ৰূপত দেখা দিছে । ড্ৰাগছৰ ধ্বংসৰ মুখলৈ গতি কৰিছে বহু নৱ প্ৰজন্ম । ধ্বংস হৈছে বহু পৰিয়াল । লগতে অমানিশা নামি আহিছে বহু প্ৰতিভাৰ ভৱিষ্যতলৈ । চৰকাৰ তথা প্ৰশাসনে নিৰ্মূলৰ বাবে দৃঢ় পদক্ষেপ গ্ৰহণ কৰি তৎপৰতাৰে ড্ৰাগছ বিৰোধী অভিযানত নামি পৰিছে যদিও সম্পূৰ্ণৰূপে ৰোধ কৰিবলৈ সকলোৰে সহযোগিতাৰ প্ৰয়োজন। আজি এইবোৰ কাৰণতে ড্ৰাগছৰ বিৰুদ্ধে সজাগতা সৃষ্টিৰ উদ্দেশ্যে গোলাঘাট আইন মহাবিদ্যালয়ত এখনি ড্ৰাগছ বিৰোধী সজাগতামূলক সভাৰ অনুষ্ঠিত কৰা হয়। মহাবিদ্যালয়খনৰ অধ্যক্ষ ড০ ভূমিকা গোস্বামীয়ে উদ্দেশ্যব্যাখ্যা আগবঢ়োৱা ‘ড্ৰাগছৰ অপব্যৱহাৰঃ যুদ্ধ আৰু প্ৰতিৰোধ’ শীৰ্ষক বিষয় হিচাপে লৈ অনুষ্ঠিত সজাগতামূলক সভাত সমল ব্যক্তিৰূপে উপস্থিত থাকে অধিবক্তাদ্বয় দুৰ্গা প্ৰসাদ জয়চোৱাল আৰু জয়ন্ত কুমাৰ গোস্বামী। দুয়োগৰাকী বক্তাই ড্ৰাগছ কৰালগ্ৰাসৰ পৰা কেনেদৰে নৱপ্ৰজন্মক উদ্ধাৰ কৰিব পৰা যায় বা ইয়াক কেনেদৰে নিৰ্মূল কৰিব পাৰে সেই সন্দৰ্ভত বক্তব্য প্ৰদান কৰে। 
সভাত গোলাঘাট আইন মহাবিদ্যালয়ৰ পৰিচালনা সমিতিৰ সভাপতি মনোজ জালান, মহাবিদ্যালয়খনৰ ছাত্ৰ একতা সভাৰ বিষয়ববীয়া তথা ছাত্ৰ-ছাত্ৰীসকল উপস্থিত থাকে।