মহাপুৰুষ মাধৱদেৱৰ জন্মস্থানৰ শোভাবৰ্ধন কৰা পাঁচশ বছৰীয়া  আমগছ জোপাৰ মৰি শুকাব ধৰিছে ৷ বিগত এটা মাহত আমগছ জোপাৰ কেঁচা পাতবোৰ শুকাই সৰি যোৱা প্ৰত্যক্ষ কৰি গছজোপা মৃত্যু হোৱা বুলি ধাৰণা কৰা হৈছে ৷ পৰিচালনা সমিতিয়ে বিষয়টো আজিও গুৰুত্ব সহকাৰে নোলোৱাৰ বাবে বিভিন্ন জনে দুখ প্ৰকাশ কৰিছে ৷ কি কাৰনে গছজোপাৰ মৃত্যু হ’বলৈ ধৰিছে আৰু ইয়াৰ প্ৰতিকাৰ কিয় কৰা নাই এই সম্পৰ্কে পৰিচালনা সমিতিৰে হোৱা সাক্ষাৎকাৰত সমিতিখনে কয় যে গছজোপাত দীৰ্ঘদিনে ৰঘুমলাই চানি ধৰাৰ বাবেই মৃত্যু ঘটিছে ৷ গছজোপাৰ ৰঘুমলা কাটিবলৈ গছত উঠিবলৈ কোনো লোকে সাহস নকৰাৰ বাবে আজিও ৰঘুমলা কাটিব নোৱাৰা বুলি জানিবলৈ দিয়াৰ লগতে কয় গছ জোপা জীয়াই তুলিবৰ বাবে কৃষি বিভাগ আৰু উদ্ভিদবিদৰ সৈতে যোগাযোগ অব্যাহত ৰাখিছে ৷ পৰিস্থিতি যিয়েই নহওঁক এজোপা পাঁচশ বছৰীয়া আমগছ সংৰক্ষণৰ ক্ষেত্ৰত জন্মস্থান পৰিচালনা সমিতি খনে গুৰুত্ব প্ৰদান নকৰাৰ বাবেই এনেদৰে নিঃশেষ হোৱাতো দুৰ্ভাগ্যজনক বিষয় ৰুপে চিহ্নিত হৈছে ৷ প্ৰায় আশী শতাংশ মৃত্যু হোৱা গছ জোপা যি কোনো প্ৰকাৰে জীয়াই তুলিবলৈ বিশেষজ্ঞসকলৰ পৰামৰ্শ বিচাৰিছে জন্মস্থানৰ ভকত বৈষ্ণৱসকলে ৷