খাদ্যৰ সন্ধানত জনাঞ্চলত প্ৰবেশ বনৰীয়া হাতীৰ ৷ জামুগুৰিহাটৰ উত্তৰাঞ্চলত অব্যাহত আছে বনৰীয়া হাতীৰ সন্ত্ৰাস ৷ অঞ্চলটোৰ এক নং বৰদিকৰাই, খৃষ্টানবস্তি, আজাৰগুৰি, বৰদিকৰাই, বামুণিপামকে ধৰি একাধিক অঞ্চলত বনৰীয়া হাতীৰ উপদ্ৰপ বৃদ্ধি পাইছে ৷ নামেৰী বনাঞ্চলৰ পৰা ওলাই অহা জাক জাক বনৰীয়া হাতীয়ে অঞ্চলটোৰ কৃষক ৰাইজৰ নিদ্ৰা হৰণ কৰিছে ৷ কৃষকৰ খেতি নষ্ট কৰি অহাৰ লগতে অঞ্চলটোৰ বহুলোক বনৰীয়া হাতীৰ আক্ৰমনত মৃত্যু হৈছে ৷ যোৱা এটা দশকত কুৰিৰো অধিক লোক বনৰীয়া হাতীৰ গচকত মৃত্যু হোৱাৰ লগতে শতাধিক লোক ঘূনীয়া হৈছে ৷ বহুতৰে ঘৰ-দুৱাৰ ভাঙি তহিলং কৰিছে ৷ স্থানীয় কৃষক ৰাইজে অঞ্চলটোত বনৰীয়া হাতীৰ সন্ত্ৰাস প্ৰতিৰোধৰ ক্ষেত্ৰত চৰকাৰক প্ৰয়োজনীয় ব্যৱস্থা গ্ৰহণৰ দাৱী জনাইছে ৷