২০১৪ চনলৈ তেওঁ বিচাৰি পোৱা নাছিল উপাৰ্জনৰ ভাল পথ। সেই বছৰতে খাদী বোৰ্ডৰ পৰা আঢ়ৈ লাখ টকা ঋণ লাভ কৰে দিলীপ কুমাৰ শৰ্মাই। পকাদলিৰ নিজা বাসগৃহ সংলগ্ন কৃষিভূমিতে আৰম্ভ কৰে তিনিবিঘা পানীকালীৰ এটি পুখুৰী। লগে লগে পাৰত আৰম্ভ কৰে কল, নেমুটেঙা আৰু বিভিন্ন শাক-পাচলিৰ খেতি। ইয়াৰ পিছতে আৰ্থিক অৱস্থা কিছু সচ্ছল হোৱাত কৃষক গৰাকীয়ে আৰম্ভ কৰে আন এটি দুবিঘাৰ পুখুৰী। সেইটো বনৰীয়া মাছৰ বাবে। সম্পূৰ্ণ বৈজ্ঞানিক পদ্ধতিৰ মাছ পুহিবলৈ আৰম্ভ কৰা কৃষক জনে বৰ্তমান পুহিছে এজাক থলুৱা ছাগলী, হাঁহ আৰু উন্নত প্ৰজাতিৰ এটি গাই। গাইজনীয়ে গাখীৰ দিয়ে ১৫ লিটাৰ পৰ্যন্ত। পুখুৰীটোৰ পাৰত বৰ্তমান আছে কেইবাজোপাও বহু মূল্যবান বগা চন্দনৰ গছ। সদ্যহতে কৃষকজনে বছৰি ডেৰ-দুই লাখ টকা উপাৰ্জন কৰে বুলি জানিবলৈ দিয়ে।