প্ৰাচীন ঐতিহ্য আৰু গৰিমাৰে মহিমামণ্ডিত  অসমৰ জিলাসমমূহৰ ভিতৰত অন্যতম ধেমাজি জিলা ৷ ১৯৮৯  চনৰ ২ অক্টোবৰত জিলা হিচাপে ঘোষিত ধেমাজি জিলাৰ পূৰ্ণাঙ্গ বুৰঞ্জী অদ্যাপি প্ৰকাশ নোহোৱাত  শেহতীয়াকৈ আগবাঢ়ি আহিছে অসম সাহিত্য সভাৰ অন্যতম সক্ৰিয় শাখা ধেমাজি সাহিত্য সভা ৷ অলপতে ধেমাজি সাহিত্য সভাই  তিলেন গগৈক মুখ্য সম্পাদক , বগেন গগৈ আৰু নিবেদিতা বৰা সন্দিকৈক  সম্পাদক হিচাপে লৈ গঠন কৰা সম্পাদনা সমিতিৰ  এক গুৰুত্বপূৰ্ণ বৈঠকত  " পূৰ্ণাঙ্গ ধেমাজি বুৰঞ্জী " প্ৰণয়নৰ সন্দৰ্ভত বিস্তৃতভাৱে আলোচনা কৰা হয় আৰু অহা ২৫  মাৰ্চত বৃহৎ গ্ৰন্হখন উন্মোচন কৰাৰ সিদ্ধান্ত গ্ৰহণ কৰা হয় ৷ ধেমাজি সাহিত্য সভাৰ সভাপতি লক্ষী বৰগোহাঁয়ে জানিবলৈ দিয়ামতে  ১ হাজাৰ পৃষ্ঠাযুক্ত এই বৃহৎ গ্ৰন্হখনত ধেমাজি জিলাৰ সামাজিক , সাংস্কৃতিক , শৈক্ষিক , সাহিত্য , বাণিজ্যিক , ৰাজনৈতিককে  ধৰি সকলো দিশ  সন্নিবিষ্ট কৰা হ'ব ৷