দৰঙৰ ঐতিহাসিক খটৰা সত্ৰৰ প্ৰেক্ষাগৃহত প্ৰয়াত নৰেশ্বৰ শৰ্মা বৰুৱা সোঁৱৰণি নাগাৰা নাম বিদ্যা মন্দিৰৰ জৰিয়তে নাগাৰা নামৰ পাঠক শিল্পীসকলক নাগাৰা নামৰ প্ৰশিক্ষণ প্ৰদান কৰা হৈছে ৷ দৰং-ওদালগুৰি জিলা নাগাৰা নাম সংঘৰ উদ্যোগত অবিভক্ত দৰঙত ইতিমধ্যে প্ৰতিষ্ঠা হোৱা নৰেশ্বৰ শৰ্মা বৰুৱা সোঁৱৰণি নাগাৰা নাম বিদ্যা মন্দিৰৰ তত্ত্বাৱধানত ঐতিহাসিক খটৰা সত্ৰৰ প্ৰেক্ষাগৃহত প্ৰত্যেক দেওবাৰে নাগাৰা নামৰ পাঠক শিল্পীসকলক প্ৰশিক্ষণ প্ৰদান কৰি আহিছে ৷ দৰং-ওদালগুৰি জিলাৰ প্ৰায় ত্ৰিশ গৰাকী নাগাৰা নামৰ পাঠক শিল্পীক প্ৰশিক্ষণ প্ৰদান কৰে নাগাৰা নামৰ গুৰু লেখীয়া শিল্পী বলোৰাম বৈশ্য, নৰেশ্বৰ কলিতা, ধৰ্মকান্ত ডেকা, ঝিল্কা কলিতা, গনেশ ডেকা আৰু বলেন কুমাৰ শইকীয়াই ৷ দৰঙৰ অন্যতম লোককৃষ্টিৰ নাগাৰা নামৰ হেৰাই যাব ধৰা ঐতিহ্য ৰক্ষাৰ প্ৰচেষ্টা হিচাপে এনে পদক্ষেপ গ্ৰহণ কৰা বুলি জানিব দিয়ে নাগাৰা নামৰ বিশিষ্ট শিল্পী বসন্ত চহৰীয়াই ।