সংকটৰ গৰাহত পৰিছে ৰঙিয়াৰ ঐতিহাসিক আৰিমত্ত গড় । যোৱা ১৬ জুনত হোৱা প্ৰলয়ংকাৰী বানে ইতিহাস প্ৰসিদ্ধ গড়টো মাদৈকাটাত এশ ফুট পৰ্যন্ত ভাঙি গৈছে । উল্লেখযোগ্য যে মাদৈকাটাৰ লগতে কাউৰবাহাকে ধৰি কেইবাখনো গাঁৱৰ সহস্ৰাধিক লোকক পুঠিমাৰী নৈৰ বাঢ়নি পানীৰ পৰা ৰক্ষা কৰি আছিল এই গড়টোৱে । কিন্তু এইবাৰ বানৰ প্ৰৱল সোঁতে গড়টো ভাঙি পেলোৱাৰ পিছত বহু গাঁও জলমগ্ন হৈ পৰে । ঐতিহ্যমণ্ডিত এই গড়টোৱে ৰঙিয়াৰ বাবে এক সুকীয়া পৰিচয় বহন কৰাৰ লগতে বছৰ বছৰ ধৰি এই অঞ্চলটোক সুৰক্ষাও প্ৰদান কৰি আহিছিল। কিন্তু এইবাৰ বলিয়া বানত গড়টো ভাঙি যোৱাৰ ফলত অঞ্চলটো প্লাবিত হোৱাৰ লগতে ঐতিহ‍্যমণ্ডিত গড়টোৰ অস্তিত্বও বিপদাপন্ন হৈ পৰিছে । স্থানীয় লোকে অঞ্চলটোৰ সুৰক্ষাৰ লগতে ঐতিহাসিক সমল থকা এই গড়টো সুৰক্ষিত কৰাৰ বাবে চৰকাৰক অতি শীঘ্ৰে উপযুক্ত পদক্ষেপ গ্ৰহণ কৰিবলৈ দাবী জনাইছে ।