গুৰুজনাৰ তিৰোভাৱ তিথিৰ দিনটোত গোলাঘাটৰ শ্ৰী শ্ৰী আঠখেলীয়া নামঘৰত সেৱা ল’লে কৃষিমন্ত্ৰী অতুল বৰাই ৷ আজি জগতগুৰু শ্ৰীমন্ত শংকৰদেৱৰ ৪৫৪ সংখ্যক তিৰোভাৱ তিথি। ৰাজ্যৰ বিভিন্ন প্ৰান্তৰ লগতে গোলাঘাটৰ শ্ৰী শ্ৰী আঠখেলীয়া নামঘৰতো পুৱাৰে পৰা দেখা ভক্তপ্ৰাণ ৰাইজৰ গুনানুকীৰ্তন ৷ ৰাজ্যৰ বিভিন্ন প্ৰান্তৰ ভক্তপ্ৰাণ লোক আহি আঠখেলীয়া নামঘৰত এগচি বন্তি প্ৰজ্বলন কৰাৰ লগতে শৰাই অৰ্চনা কৰে ৷ আনহাতে পুৱাৰে পৰা নামঘৰত পুৰুষ-মহিলা সকলোৱে নাগাৰা নাম গাই এক আধ্যাত্মিক পৰিবেশৰ সৃষ্টি কৰিছে ৷ মহাপুৰুষ শ্ৰীমন্ত শংকৰদেৱৰ তিৰোভাৱ তিথিৰ দিনটোত আঠখেলীয়া নামঘৰত উপস্থিত হয় কৃষিমন্ত্ৰী অতুল বৰা ৷ মন্ত্ৰীগৰাকীয়ে নামঘৰত বন্তি প্ৰজ্বলন কৰি সকলোৰে মংগল কামনাৰে ভগৱানৰ ওচৰত প্ৰাৰ্থনা জনাই ৷ ৰাজনৈতিক কামত প্ৰতিদিনাই ব্যস্ত থকা মন্ত্ৰী অতুল বৰাই আধ্যাত্মিক পৰিবেশৰ মাজত নিজকে বিলীন কৰিলে ৷ শ্ৰীমন্ত শংকৰদেৱৰ তিথি উপলক্ষে হাজাৰ ভক্তপ্ৰাণ ৰাইজে ভিৰ কৰিলেহি আঠখেলীয়া নামঘৰত ।