वाघोली-लोहगाव चौकात वाहनांची होणारी कोंडी टाळण्यासाठी वाहतूक पोलीसाची नेमणूक करण्याबाबत भारतीय जनता पार्टीच्या वतीने वाहतूक विभागाचे सहायक पोलिस निरीक्षक जयंत पाटील यांना निवेदन देण्यात आले. वाघोली येथील लोहगाव चौकात मोठ्या प्रमाणात वाहतूक कोंडी होत असते. लोहगाव रस्त्यावर अनेक सोसायटी, नागरीवस्तीसह अनेक शाळाही आहेत. तर दुसऱ्या बाजूला भावडीकडे जाणारे अनेक खडी, क्रश सँडसह इतर जड वाहतूक करणारी अनेक वाहने ये-जा करतात. त्यामुळे या चौकामध्ये मोठ्या प्रमाणावर वाहतूक कोंडी होत आहे. या कोंडीमुळे मुलांना शाळा सुटल्यानंतर घरी येण्यासाठीही दोन तास लागत असल्यामुळे पालकांनाही मोठा मनस्ताप सहन करावा लागत असे. या सर्व बाबींमुळे भाजप युवा मोर्चाचे जिल्हा संघटन सचिव व वाघोलीचे माजी उपसरपंच संदीप सातव यांनी पदाधिकार्‍यांसह सहायक पोलिस निरीक्षक जयंत पाटील यांची भेट घेतली. यावेळी वाघोली-लोहगाव चौकात वाहनांची होणारी कोंडी टाळण्यासाठी लोहगाव चौकात एक वाहतूक पोलीसाची तातडीने नेमणूक करण्याची विनंती केली. यावेळी आव्हाळवाडी गावचे माजी सरपंच हेमंत सातव, अविनाश सातव आदीसह कार्यकर्ते उपस्थित होते.