ડીસાના કંસારી ટોલનાકા નજીક પોલીસે કારમાં સવાર બે શખ્સોને રૂ.48,000 ના 16 ગ્રામ મેફેડ્રોન ડ્રગ્સ સાથે ઝડપી પાડ્યા હતા. પ્રાથમિક તપાસમાં ડ્રગ્સ ધાનેરાના માલોત્રા ગામના શખ્સ પાસેથી મેળવ્યાનો ખુલાસો થયો હતો.

બનાસકાંઠા એલ.સી.બી. પી.આઇ. અને એસ.ઓ.જી. ઇન્ચાર્જ પી.આઇ. દિગ્વિજયસિંહ રાઠોડની ટીમ શુક્રવારની મોડી રાત્રે ડીસા શહેરી વિસ્તારમાં બાતમી આધારે રાત્રે બે વાગ્યાની આજુબાજુ ડીસા-ધાનેરા રોડ પર કંસારી ટોલનાકા પાસે વોચ ગોઠવી હતી. ત્યારે રાજસ્થાન તરફથી આવતી ગાડી (જીજે-08-સીએસ-1327) ને ઉભી રખાવી હતી. ગાડી ડ્રાઇવર જોગેશકુમાર ઠાકોર (રહે.શિવધામ સોસાયટી, ડીસા પાટણ હાઇવે) અને બાજુની સીટ પર બેઠેલા શાહીલ પ્રવિણભાઇ વાઘેલા (રહે.હાલ શિવનગર ચોકડી, ડીસા, મૂળ રહે. આસેડા, તા.ડીસા) ની તપાસ કરતાં બંનેના ખિસ્સામાંથી માદક પદાર્થ મળ્યો હતો.

ઘટનાસ્થળે જ એફ.એસ.એલ.ની મોબાઇલ વાનને બોલાવી પ્રાથમિક રાસાયણિક પરીક્ષણ કરાવતા આ જથ્થો મેફેડ્રોન ડ્રગ્સ હોવાનું સ્પષ્ટ થયું હતું. સોની પાસે ઇલેક્ટ્રોનિક કાંટાથી વજન કરાવતા બંને પાસેથી રૂ. 48,000 નું 8-8 ગ્રામ ડ્રગ્સ મળી આવ્યું હતું. પોલીસે ગાડી સહીત રૂ.5.78 લાખનો મુદ્દામાલ કબજે કરી કાર્યવાહી હાથ ધરી હતી.

પોલીસ પૂછપરછમાં આરોપીઓએ કબૂલ્યું હતું કે, મેફેડ્રોન ડ્રગ્સનો જથ્થો ધાનેરા નજીકના માલોત્રા ગામના ડાહ્યાભાઇ કાનજીભાઇ ચૌધરી પાસેથી લાવ્યા હતા. બીજી તરફ જોગેશ ઠાકોરે જણાવ્યું હતું કે, તેણે મિત્ર મનોજ વણકરની કાર બહાર ગામ જવાનું કહીને લાવી હતી. પોલીસે સપ્લાયર સહીત સમગ્ર નેટવર્કની તપાસ હાથ ધરી હતી.