ડીસા માં ટ્રક અને એક્ટિવા વચ્ચે અકસ્માત સર્જાતાં કિશોર નું સારવાર દરમિયાન મોત..

DEESA // ડીસા પાલનપુર હાઇવે પર માર્ગ અકસ્માતનો સીલસીલો યથાવત રહ્યો છે, ત્યારે શનિવારે સાંજે ગીર કાઠીયાવાડી હોટલ નજીક ટ્રક ચાલકે પૂરપાટ ઝડપે ગફલતભરી રીતે ડ્રાઇવિંગ કરી એક્ટિવા સવાર કિશોર ને અડફેટે લેતા ગંભીર અકસ્માત સર્જાયો હતો, આ દુર્ઘટના માં ગંભીર રીતે ઘવાયેલા કિશોર નું સારવાર દરમિયાન મોત નિપજતાં પઢિયાર પરિવાર અને માળી સમાજ માં ઘેરા શોકની લાગણી ફેલાઇ ગઇ છે, જ્યારે ટ્રક ચાલક ટ્રક મૂકી ફરાર થઇ ગયો હતો. આ અંગે ડીસા દક્ષિણ પોલીસ મથકે ટ્રક ચાલક સામે ગુનો નોંધી આગળની તપાસ હાથ ધરી છે..

આ અંગેની વિગત એવી છે કે, ડીસાના ત્રણ હનુમાન મંદિર નજીક આવેલ એમ.કે. પાર્ક માં રહેતાં દિનેશભાઇ ભુદરાજી પઢિયાર (માળી) નો સુપુત્ર ભવ્ય દિનેશભાઇ પઢિયાર (માળી) (ઉં.વ.આ. 20) પોતાના મિત્રો સાથે ઇનોવા કારમાં પાલનપુર ટોયેટોના શો-રૂમમાં નવી કાર જોવા માટે ગયા હતા..

ત્યાર બાદ ડીસા તરફ શનિવારે સાંજે પરત ફરતાં પોતાના મિત્રો સાથે ડીસા ના રાજમંદિર નજીક આવેલ ગીર કાઠીયાવાડી હોટલ સામે એકટીવા પાર્ક કર્યું હતું, તે એકટીવા નં. GJ-08-ED-7999 લઇને ઘર તરફ જતાં હતા, તે દરમિયાન માતેલી સાંઢની જેમ પૂરપાટ ઝડપે ગફલતભરી રીતે ડ્રાઇવિંગ કરી ટ્રક નં. RJ-46-GA-5678 ચાલકે પાછળ થી એક્ટિવા ચાલક ને ધડાકાભેર ટક્કર મારતાં એકટીવા ચાલક કિશોર નીચે પટકાતાં શરીરે અને માથાના ભાગે ગંભીર ઇજાઓ પહોંચી હતી, જ્યારે અકસ્માત બાદ ઘટના સ્થળે આજુ બાજુ ના લોકો તાત્કાલીક દોડી આવ્યા હતા અને લોહી લુહાણ હાલતમાં કિશોર ને તાત્કાલીક સારવાર અર્થે નજીકની હોસ્પિટલમાં ખસેડયો હતો, જોકે, હોસ્પિટલ માં ટૂંકી સારવાર બાદ તેની સ્થિતિ વધુ નાજુક જણાતાં તેનું સારવાર દરમિયાન મોત નિપજ્યું હતું..

આ ઘટના ની જાણ થતાં જ ડીસા દક્ષિણ પોલીસ નો કાફલો ઘટના સ્થળે અને હોસ્પિટલમાં દોડી આવ્યો હતો, ત્યાર બાદ ડીસા દક્ષિણ પોલીસે મૃતદેહ ને ડીસા સિવિલ હોસ્પિટલમાં પી.એમ. અર્થે ખસેડ્યો હતો, જ્યારે પઢિયાર પરિવાર અને માળી સમાજ માં ઘેરા શોકની કાલીમાં પ્રસરી ગઇ હતી, જ્યારે ટ્રક ચાલક ટ્રક મૂકી ફરાર થઇ ગયો હતો..

આ અંગે ડીસા દક્ષિણ પોલીસ મથકે ટ્રક ચાલક સામે ગુનો નોંધી વધુ તપાસ હાથ ધરી છે, હાલમાં ડીસા દક્ષિણ પોલીસે ફરાર ટ્રક ચાલકને પકડવા અને વધુ તપાસ માટે ચક્રો ગતિમાન કર્યાં છે..