કાલોલ જાહેર માર્ગ પર અડચણ ઉભી કરનાર લસ્સી સેન્ટરના સંચાલક સામે પોલીસની  કાર્યવાહી

કાલોલ ટાઉન પોલીસ દ્વારા રવિવારે ટ્રાફિક વ્યવસ્થામાં અડચણ ઉભી કરનારા તત્વો સામે કડક ઝુંબેશ હાથ ધરવામાં આવી હતી. આ દરમિયાન બસ સ્ટેન્ડ જેવા વ્યસ્ત વિસ્તારમાં જાહેર રોડ પર દબાણ કરી રાહદારીઓ અને વાહનચાલકો માટે મુશ્કેલી સર્જનાર એક વેપારી વિરુદ્ધ ગુનો નોંધી તેની અટકાયત કરવામાં આવી છે. કાલોલ પોલીસ સ્ટેશન ટીમ જ્યારે ટાઉન વિસ્તારમાં પેટ્રોલિંગમાં હતી, ત્યારે કાલોલ બસ સ્ટેન્ડની સામે શ્રી ક્રિષ્ણા લસ્સી' નામની દુકાન ધરાવતા સંચાલકે જાહેર માર્ગ પર દબાણ કર્યું હોવાનું જણાઈ આવ્યું હતું. આ દબાણને કારણે રસ્તા પરથી પસાર થતા રાહદારીઓ અને વાહનોના અવરજવરમાં ભારે અડચણ પેદા થઈ રહી હતી.પોલીસે પંચોની હાજરીમાં તપાસ હાથ ધરી દુકાનદારનું નામ પૂછતા તેણે પોતાનું નામ રાકેશકુમાર ડાહયાભાઇ રાણા(ઉંમર વર્ષ ૫૦, રહે. કાલોલ તળાવ પાસે) હોવાનું જણાવ્યું હતું. જાહેર રોડ પર ટ્રાફિક જામ કરવા બાબતે પૂછપરછ કરતા કોઈ સંતોષકારક જવાબ ન મળતા પોલીસે તેની અટકાયત કરી હતી.પોલીસે આરોપી રાકેશકુમાર રાણા વિરુદ્ધ ભારતીય ન્યાય સંહિતા (BNS) ૨૦૨૩ ની કલમ ૨૮૫મુજબ ગુનો નોંધી કાયદેસરની કાર્યવાહી હાથ ધરી છે.શહેરમાં ટ્રાફિકની સમસ્યા હલ કરવા અને જાહેર માર્ગો ખુલ્લા રાખવા માટે પોલીસ સતત કાર્યરત છે.