પાવીજેતપુરમા ૧૮ તાલુકા પંચાયત અને ૪ જિલ્લા પંચાયત બેઠકો માટે વહીવટી તંત્ર સજ્જ, ૮૬૧ ચૂંટણી કર્મચારીઓ સાહિત્ય સાથે રવાના.
પાવીજેતપુર, તા.૨૫
પાવીજેતપુર તાલુકામાં ૧૮ તાલુકા પંચાયત તેમજ ૪ જિલ્લા પંચાયતની બેઠકો માટે વહીવટી તંત્ર દ્વારા તમામ તૈયારીઓ પૂર્ણ કરી દેવામાં આવી છે. ૮૬૧ જેટલા ચૂંટણી કર્મચારીઓને ચૂંટણી કામગીરી માટે રવાના કરી દેવામાં આવ્યા છે.
ચૂંટણીની કામગીરીને સુચારુ રીતે પાર પાડવા માટે નિયત કરાયેલા મતદાન મથકો પર ચૂંટણી કર્મચારીઓને જરૂરી સાહિત્ય અને સામગ્રી સાથે રવાના કરવામાં આવ્યા છે. જિલ્લા પંચાયતની ચાર બેઠકો માટે ૧૩ ઉમેદવારો મેદાનમાં છે તેમજ તાલુકા પંચાયતને ૧૮ બેઠકો માટે ૫૭ ઉમેદવારો મેદાનમાં છે.
ચૂંટણી પ્રક્રિયા શાંતિપૂર્ણ રીતે સંપન્ન થાય તે માટે વહીવટ તંત્ર દ્વારા કુલ ૬૪૫ જેટલા મતદાન કર્મચારીઓને ફરજ પર તૈનાત કરવામાં આવ્યા છે. તેમજ કાયદો અને વ્યવસ્થા જાળવવા માટે ૨૧૬ પોલીસ સ્ટાફના જવાનો તૈનાત કરી કુલ ૮૬૧ ચૂંટણી કર્મચારીઓને તૈનાત કરી દેવામાં આવ્યા છે. ૧૨૯ બુથ મથકો માટે EVM મશીનો ૧૦% રિઝર્વ સહિત કુલ ૧૫૫ બેલેટ યુનિટ અને ૧૫૫ કંટ્રોલ યુનિટ ની ફાળવણી કરવામાં આવી છે. ૯ જેટલા સંવેદનશીલ બુથો ઉપર વધુ સુરક્ષા સ્ટાફની વ્યવસ્થા કરવામાં આવી છે.
પાવીજેતપુર તાલુકામાં કુલ ૯૭,૩૦૬ મતદારો પોતાના મતાધિકારનો ઉપયોગ કરશે. જેમાં ૫૦,૩૫૦ પુરૂષ મતદારો અને ૪૬,૯૫૬ સ્ત્રી મતદારોનો સમાવેશ થાય છે. આજે સવારથી જ તમામ પોલિંગ સ્ટાફને જરૂરી ફોર્મ્સ, ઈવીએમ મશીન અને અન્ય સાહિત્યની વહેંચણી કરી તેમને નિયત કરેલા રૂટ પર રવાના કરી દેવામાં આવ્યા છે.
સમગ્ર પ્રક્રિયા પર નજર રાખવા માટે ૨ આર.ઓ. અને ૨ એ.આર.ઓ. ની નિગરાણી હેઠળ સમગ્ર ચૂંટણી કામગીરી પૂરજોશમાં ચાલી રહી છે.
