પાવીજેતપુરના સુસ્કાલ પાસે કાર અને ટ્રેક્ટર વચ્ચે ગમખ્વાર અકસ્માત સર્જાતા કાર ચાલાકનું કમકમાટીભર્યું મોત
પાવીજેતપુર, તા. ૨૧
પાવીજેતપુર તાલુકાના સુસ્કાલ ગામ પાસે ગત રાત્રિએ એક ભયાનક અકસ્માત સર્જાયો હતો. પૂરપાટ ઝડપે આવતા એક અજાણ્યા ટ્રેક્ટર અને કાર વચ્ચે થયેલી ગમખ્વાર ટક્કરમાં પાવીજેતપુરના ૫૫ વર્ષીય રાકેશભાઈ સોલંકીનું ઘટનાસ્થળે જ કરુણ મોત નીપજ્યું છે. આ ઘટનાને પગલે સમગ્ર પંથકમાં અરેરાટી વ્યાપી ગઈ છે.
મળતી માહિતી અનુસાર, પાવી જેતપુરના દાંડિયા બજાર વિસ્તારમાં રહેતા રાકેશભાઈ જીવનભાઈ સોલંકી (ઉં.વ. ૫૫) ગત તારીખ ૨૦ની રાત્રિએ પોતાની કાર લઈ પાવીજેતપુર તરફ આવી રહ્યા હતા. આ દરમિયાન સુસ્કાલ ગામ પાસે એક ટ્રેક્ટરના ચાલકે પોતાના કબજાનું વાહન ગફલતભરી રીતે હંકારી રાકેશભાઈની કાર સાથે જોરદાર અકસ્માત સર્જ્યો હતો. આ અકસ્માત એટલો ભયાનક હતો કે કારમાં સવાર રાકેશભાઈને ડાબા પગે તેમજ છાતીના ભાગે ગંભીર ઈજાઓ થતા તેઓનું ઘટનાસ્થળે જ પ્રાણપંખેરું ઊડી ગયું હતું.
ઘટનાની જાણ થતાં જ પાવીજેતપુર પોલીસ તાત્કાલિક સ્થળ પર પહોંચી આગળની કાર્યવાહી હાથ ધરી હતી. પોલીસે આ મામલે અજાણ્યા ટ્રેક્ટર ચાલક વિરુદ્ધ ગુનો નોંધી, વધુ તપાસ અને તેની અટકાયત કરવાના ચક્રો ગતિમાન કર્યા છે. દાંડિયા બજારના રહીશ અને પરિચિત વ્યક્તિના આવા આકસ્મિક અવસાનથી પરિવાર અને સ્થાનિકોમાં ઘેરા શોકની લાગણી છવાઈ છે.
