છોટાઉદયપુરમાં પોલીસનો મોટો દરોડો: પાવીજેતપુર ના વસનગઢ ગામેથી ૬.૩૫ લાખનો વિદેશી દારૂ ઝડપાયો, ૧૦ ઇસમો સામે ગુનો દાખલ
પાવીજેતપુર, તા.૧૮
છોટાઉદયપુર
જિલ્લામાં પ્રોહિબિશનની પ્રવૃત્તિઓને ડામવા માટે સ્ટેટ મોનિટરિંગ સેલે હાથ ધરેલી કાર્યવાહીમાં મોટી સફળતા મળી છે. વિરપુર અને ખોરવન્યા ગામના શખ્સો દ્વારા ચલાવવામાં આવતી દારૂની લાઇન પર ત્રાટકેલી પોલીસે કુલ રૂપિયા ૬,૩૫,૧૭૮/- ની કિંમતનો ભારતીય બનાવટનો વિદેશી દારૂ અને બીયરનો જથ્થો ઝડપી પાડ્યો છે. આ કામગીરીમાં કુલ ૪ મોટરસાયકલ અને ૩ મોબાઈલ ફોન સહિત કુલ ૮.૫૦ લાખથી વધુનો મુદ્દામાલ કબજે કરવામાં આવ્યો છે.
પ્રાપ્ત માહિતી મુજબ
પોલીસને મળેલી ચોક્કસ બાતમીના આધારે પાડવામાં આવેલી રેઇડ દરમિયાન, બજાજ પલ્સર મોટરસાયકલ પર સવાર આરોપી (૧) જયંતિ વરસનભાઈ રાઠવા અને (૨) નિલેશ કેશરભાઈ રાઠવા (બંને રહે. વિરપુર) ને વિદેશી દારૂની કુલ ૨૦૮૫ નંગ નાની-મોટી બોટલો સાથે ઝડપી લેવામાં આવ્યા હતા. તપાસમાં બહાર આવ્યું હતું કે આરોપી (૩) નિતેશ પોપટભાઈ રાઠવા (રહે. ખોરવન્યા) આ દારૂની લાઇન ચલાવતો હતો અને જુદા-જુદા મોટરસાયકલોમાં જથ્થો ભરાવી રવાના કરતો હતો.
પોલીસની કાર્યવાહી જોઈને અન્ય સાગરિતોમાં ફફડાટ ફેલાઈ ગયો હતો. રેઇડ દરમિયાન અન્ય દારૂની ખેપ મારનાર બાઈક ચાલકો પોતાની બાઈકો ફેંકીને તથા કેટલાક દારૂ ફેકીને બાઇક લઈને ફરાર થઈ ગયા હતા.
મુદ્દામાલની વિગત તપાસતા દારૂ/બીયરની બોટલો નંગ ૨૦૮૫ કિંમત રૂ. ૬,૩૫,૧૭૮/- તેમજ ૪ મોટરસાયકલ ની કિંમત રૂ. ૨,૦૦,૦૦૦/-, ૩ નંગ મોબાઈલ કિંમત રૂ. ૧૫,૦૦૦/- મળી કુલ ૮,૫૦,૧૭૮/- રૂપિયાનો મુદ્દા માલ જપ્ત કરવામાં આવ્યો છે. વધુ તપાસમાં ખૂલ્યું છે કે આ જથ્થો પાવીજેતપુરના જોખપુરા ફળિયામાં રહેતા સુભાષ ઉર્ફે સંજયભાઈ શંકરભાઈ બારીયાએ મંગાવ્યો હતો. પોલીસે કુલ ૧૦ આરોપીઓ વિરુદ્ધ પ્રોહિબિશન એક્ટ હેઠળ ગુનો નોંધી, ફરાર આરોપીઓને પકડવા ચક્રો ગતિમાન કર્યા છે.
આમ, પાવીજેતપુર તાલુકાના વસનગઢ પાસેથી ૪ મોટર સાયકલો સાથે ૮,૫૦,૧૭૮ /- ના મુદ્દા માલ સહિત બે આરોપીઓને પકડી લેવામાં આવ્યા છે જ્યારે અન્ય આઠ આરોપીઓને પકડવાના ચક્રો ગતિમાન કરવામાં આવ્યા છે.
