કાલોલ તાલુકાના સુરેલી ગામમાં ગ્રામ પંચાયતના વહીવટમાં વ્યાપક ભ્રષ્ટાચાર અને અનિયમિતતાઓ હોવાની આશંકા સાથે એક જાગૃત નાગરિકે માહિતી અધિકાર (RTI) હેઠળ વિગતો માંગતા પંચાયત આલમમાં ભારે ચકચાર મચી ગઈ હતી. ગામના પ્રવીણકુમાર દિલીપસિંહ પટેલે વર્ષ ૨૦૧૬થી આજ દિન સુધીના વિકાસ કામો અને ગ્રાન્ટની ૧૫ જેટલા મુદ્દાઓ પર પ્રમાણિત નકલો માંગી વહીવટને ખુલ્લો પાડવા કમર કસી હતી.

અરજદારે ૨૦૧૬થી અત્યાર સુધીના આયોજન પંચ, નાણાપંચ, મનરેગા, ધારાસભ્ય અને સંસદ સભ્યની ગ્રાન્ટ તેમજ લોકફાળાના તમામ કામોની વિગતો માંગી છે. જેમાં ખાસ કરીને:વિકાસ કામોના પ્લાન એસ્ટીમેટ, વર્ક ઓર્ડર, મસ્ટર અને MOU ની નકલો.કોન્ટ્રાક્ટરોના નામ-સરનામા અને તેમને કરેલી ચૂકવણીના ચેક નંબર તથા બિલની વિગતો.આવાસ યોજના અને શૌચાલય યોજનાના લાભાર્થીઓની યાદી.પેવર બ્લોકના કામોના ટેન્ડર અને વર્ક ઓર્ડર,ગ્રામસભાના મિનિટ્સ બુક અને હાજરી રજિસ્ટરની નકલો.વપરાયા વિના પરત ગયેલી ગ્રાન્ટ અને કુદરતી આફતમાં અપાયેલી સહાયની વિગત.

સરપંચ પર પક્ષપાત અને ગેરકાયદે દબાણના આક્ષેપ

આ RTI પાછળનું મુખ્ય કારણ ગ્રામ પંચાયત દ્વારા કરવામાં આવતી 'વ્હાલા-દવલા'ની નીતિ હોવાનું ચર્ચાઈ રહ્યું છે. આક્ષેપ છે કે સરપંચે પોતે ડુંગર પડતર જમીન પર દબાણ કરી હોલ બનાવ્યો છે અને ગટર લાઇનનું કામ પણ નિયમ વિરુદ્ધ કર્યું છે. વધુમાં, સરપંચ પોતાના માનીતા લોકોના દબાણો દૂર કરતા નથી, પરંતુ ચૂંટણીમાં તેમની સામે લડેલા ઉમેદવારો અને તેમના ટેકેદારોને દબાણ અંગેની નોટિસો આપી પરેશાન કરી રહ્યા હોવાની રજૂઆત કરવામાં આવી છે.

માહિતી ન મળતા પ્રથમ અપીલ દાખલ

સુરેલી ગ્રામ પંચાયતના જાહેર માહિતી અધિકારી (તલાટી) દ્વારા નિયત સમયમર્યાદામાં માહિતી પૂરી પાડવામાં ન આવતા, અરજદાર પ્રવીણકુમાર પટેલે હવે કલમ ૧૯ મુજબ તાલુકા વિકાસ અધિકારી (TDO) સમક્ષ પ્રથમ અપીલ દાખલ કરી છે. આ અંગેની નકલ જિલ્લા વિકાસ અધિકારી (DDO) ને પણ મોકલી આપવામાં આવી છે.

"પંચાયતમાં મનરેગા અને આવાસ જેવી યોજનાઓમાં મોટાપાયે ગેરરીતિ થઈ હોવાની લોકચર્ચા છે. દબાણ હટાવવાની કામગીરીમાં પણ સત્તાનો દુરુપયોગ થઈ રહ્યો છે, જે સત્ય બહાર લાવવા મેં આ માહિતી માંગી છે." - પ્રવીણકુમાર પટેલ (અરજદાર)

હવે જોવાનું એ રહે છે કે તાલુકા વિકાસ અધિકારી આ મામલે કેવા પગલાં ભરે છે અને શું સુરેલી ગ્રામ પંચાયતનો સાચો વહીવટ પ્રજા સામે આવશે કે કેમ?