ગાંધીનગરઃ ગુજરાત સાઇબર સેન્ટર ઓફ એક્સેલન્સ દ્વારા સાઇબર માફિયાઓ સામે મોટી કાર્યવાહી કરાઈ છે. આ ઓપરેશનમાં દેશવ્યાપી સાઇબર ફ્રોડ ચલાવતી એક મોટી ગેંગનો પર્દાફાશ થયો છે. જેમાં ગેંગના માસ્ટરમાઇન્ડ સહિત કુલ 8 આરોપીને ઝડપી લેવાયા છે. આ ગેંગ દ્વારા ભારતનાં 28 રાજ્યોમાં કુલ 1,229થી વધુ સાઇબર ફ્રોડ કરવામાં આવ્યા હતા. જેમાં રૂ. 826 કરોડથી વધુની છેતરપિંડી થયાનું સામે આવ્યું છે.
9 નકલી પેઢી ઊભી કરી 28 બેન્ક એકાઉન્ટ ખોલાવ્યાં
પોલીસ તપાસમાં સામે આવ્યું છે કે, આરોપીઓએ ઠગાઈ માટે 9 નકલી પેઢી ઊભી કરી હતી અને તેના નામે કુલ 82 બેન્ક એકાઉન્ટ ખોલાવ્યાં હતાં, જેમાં 28 કરન્ટ એકાઉન્ટ અને 45 સેવિંગ એકાઉન્ટનો સમાવેશ થાય છે. આ ખાતાંનો ઉપયોગ કરોડો રૂપિયાનું ગેરકાયદે ટ્રાન્ઝેક્શન કરવા કરાતું હતું.
ડિજિટલ અરેસ્ટથી લઈને પાર્ટટાઇમ જોબ ફ્રોડ આચરતા
ઝડપાયેલા તમામ આરોપી સુરતના રહેવાસી હોવાનું જાણવા મળ્યું છે. ગેંગની મોડસ ઓપરેન્ડી અત્યંત વ્યવસ્થિત હતી. આરોપીઓ લોકોને કમિશનની લાલચ આપી તેમના નામે ખાતાં મેળવતા હતા. ત્યાર બાદ SMS, વ્હોટ્સએપ અને ટેલિગ્રામ જેવા માધ્યમથી ડિજિટલ એરેસ્ટ, ઇન્વેસ્ટમેન્ટ સ્કેમ, UPI ફ્રોડ, ડિપોઝિટ, લોન તથા પાર્ટટાઇમ જોબ ફ્રોડ જેવા ગુના આચરતા હતા.
રૂ. 500 કરોડથી વધુના નાણાકીય હવાલા
આરોપીઓ ઠગાઈથી મેળવેલી રકમ હવાલા મારફતે સાઇબર માફિયા સુધી પહોંચાડતા હતા. તપાસ દરમિયાન જાણવા મળ્યું છે કે, ગેંગ દ્વારા અંદાજે રૂ. 500 કરોડથી વધુના નાણાકીય હવાલા થયા છે. આ કેસમાં મુંબઈ અને રાજસ્થાન કનેક્શન પણ સામે આવ્યું છે, તેમજ વિદેશી કનેક્શન હોવાની શક્યતા પણ સેવાઈ રહી છે.