শিৱসাগৰঃ শিৱসাগৰ জিলাৰ মৰাবজাৰ খণ্ড প্ৰাথমিক স্বাস্থ্য কেন্দ্ৰৰ অধীনৰ বৰবাম চাহ বাগিছাৰ চিকিৎসালয়ৰ প্ৰেক্ষাগৃহত সামাজিক আচৰণ সলনিকৰণ বিষয়ক কর্মশালা এখন অনুষ্ঠিত হয়। শিৱসাগৰ জিলা স্বাস্থ্য বিভাগ আৰু মৰাবজাৰ স্বাস্থ্য খণ্ডৰ উদ্যোগত ১৯ মাৰ্চত মুঠ চাৰিখন চাহ বাগিচা সামৰি আয়োজন কৰা সামাজিক আচৰণ সলনিকৰণ বিষয়ক কর্মশালাখন সফলতাৰে সামৰণি পৰে। এই কর্মশালা মৰাবজাৰ খণ্ড প্রাথমিক স্বাস্থ্যকেন্দ্রৰ অধীনস্থ ৪ খন চাহ বাগিচাৰ স্বাস্থ্য সহায়ক, লাইন চকীদাৰ আৰু বাগিচাসমূহৰ আশাকৰ্মীসকলে অংশগ্রহণ কৰে। কর্মশালাত বাগিছাৰ গর্ভৱতী মহিলা, নৱজাতক, শিশু, জ্যেষ্ঠ নাগৰিক, পৰিপুষ্টি, স্বচ্ছতা, অনাময়, কিশোৰ-কিশোৰীৰ সু-স্বাস্থ্য ইত্যাদিৰ ওপৰত আলোকপাত কৰা হয় আৰু এখন ৰোগমুক্ত সুস্থ সমাজ গঠনৰ বাবে চাহ বাগিছাৰ লোকসকলে কেনেদৰে সহযোগ কৰিব পাৰিব সেই সন্দর্ভত প্রশিক্ষণ দিয়া হয়। বিশেষকৈ আশাকর্মীসকলৰ সৈতে চাহ বাগিছাসমূহৰ নেতৃস্থানীয় পুৰুষসকলক জড়িত কৰাই বাগিছাসমূহত মাতৃ-শিশুৰ সু-স্বাস্থ্যৰ লগতে সামূহিক সু-স্বাস্থ্য বর্তাই ৰাখিবলৈ তেওঁলোকৰ অংশীদাৰিত্ব সু-নিশ্চিত কৰিবলৈ বিচৰা হৈছে। উল্লেখযোগ্য যে, প্রতিখন বাগিছাতে স্বাস্থ্য সম্পর্কীয় কাৰ্য্যসূচীসমূহত ৰাইজৰ অধিক অংশগ্রহণ আৰু সহযোগিতা সু-নিশ্চিত কৰিবৰ বাবে একোখনকৈ ক'ৰ কমিউনিটি গ্রুপ গঠন কৰা হয় । এই গ্রুপে সক্রিয়ভাবে চাহ বাগিছাসমূহত স্বাস্থ্য সম্পর্কীয় সজাগতা সৃষ্টিৰ লগতে স্বাস্থ্য বিষয়ক আনুসংগিক কৰ্মৰাজি ৰূপায়ণ কৰাত অগ্রণী ভূমিকা পালন কৰিব। কর্মশালাখনিত সমল প্রশিক্ষক হিচাপে পিৰামল সক্ষমৰ জিলা সমন্বয়ক ভাৰ্গৱ বৰদলৈ, ৰাষ্ট্ৰী়য় স্বাস্থ্য অভিযান, শিৱসাগৰ জিলা গণমাধ্যম বিশেষজ্ঞ অঞ্জুশ্ৰী ফুকন, মৰাবজাৰ খণ্ড প্রাথমিক স্বাস্থ্যকেন্দ্ৰৰ কমিউনিটি মবিলাইজাৰ বৰ্ণালী কাকতি দত্ত, সামূহিক স্বাস্থ্য বিষয়া চিন্ময়ী কোঁৱৰ, প্ৰস্তুতি ফুকন আদি উপস্থিত থাকে ৷