उपमुख्यमंत्री एकनाथ शिंदे रत्नागिरीत; मात्र ठाकरेंच्या शिवसेनेतून जिल्हाध्यक्षांसह दोघांची हकालपट्टी 

शिंदेंच्या आभार सभेत पक्ष प्रवेशाच्या चर्चा 

( रत्नागिरी /प्रतिनिधी )

विधानसभेनंतर आता महानगरपालिका निवडणुकांच्या पार्श्वभूमीवर काही दिवसांपासून शिवेसेना ठाकरे गटाला मोठे धक्के बसत आहेत. मात्र तरीही उद्धव ठाकरे यांच्या शिवसेनेतून एकनाथ शिंदेंच्या शिवसेनेत जाणाऱ्या नेत्यांची संख्या वाढताना दिसत आहे. दोन दिवसांपूर्वी कोकणातील माजी आमदार राजन साळवी यांनी शिंदेंच्या नेतृत्वात शिवसेनेचे धनुष्यबाण हाती घेतले आहे. तर दुसऱ्या बाजूला उद्धव ठाकरेंच्या आदेशाने कोकणातील 3 बड्या पदाधिकाऱ्यांची पक्षातून हकालपट्टी करण्यात आल्याचे पत्रक प्रसिद्ध करण्यात आले आहे.

शिवसेना सचिव माजी खासदार विनायक राऊत यांच्या सहीने हे पत्रक प्रसिद्ध करण्यात आले आहे. या पत्रामध्ये म्हटलंय की, रत्नागिरी जिल्हा सहसंपर्कप्रमुख राजेंद्र महाडिक, जिल्हाप्रमुख विलास चाळके, चिपळूण संगमेश्वर विधानसभा प्रमुख रोहन बने यांनी पक्षविरोधी कारवाई केल्यामुळे शिवसेना उद्धव बाळासाहेब ठाकरे पक्षप्रमुख उद्धव ठाकरे यांच्या आदेशाने पक्षातून हकालपट्टी करण्यात आल्याची माहिती समोर आली आहे. ही माहिती पक्षाच्या मध्यवर्ती कार्यालयातून प्रसिद्धीस देण्यात आल्याचं पत्रकातून कळवण्यात आलं आहे.

काय लिहलेय पत्रात?

शिवसेना (उद्धव बाळासाहेब ठाकरे) पक्षातून हकालपट्टी, रत्नागिरी जिल्हा सहसंपर्कप्रमुख राजेंद्र महाडिक, जिल्हाप्रमुख विलास चाळके, चिपळूण संगमेश्वर विधानसभा प्रमुख रोहन वने यांनी पक्षविरोधी कारवाया केल्यामुळे माननीय शिवसेना (उद्धव बाळासाहेब ठाकरे) पक्षप्रमुख श्री. उध्दवजी ठाकरे यांच्या आदेशाने शिवसेना (उद्धव बाळासाहेब ठाकरे पक्षातून हकालपट्टी करण्यात आली आहे. अशी माहिती शिवसेना (उद्धव बाळासाहेब ठाकरे) मध्यवर्ती कार्यालयातून प्रसिद्धीस देण्यात आलेल्या पत्रकाद्वारे कळविण्यात आली आहे.

बने पिता-पुत्रांचा शिंदेसेनेत पक्ष प्रवेशाच्या चर्चा 

उपमुख्यमंत्री एकनाथ शिंदे आज रत्नागिरी दौऱ्यावरती आहेत, त्यांच्या नेतृत्वात सेनेचे 2 माजी आमदार, जिल्हा परिषदेचे माजी अध्यक्ष, दापोलीतील उद्धव सेनेचे 5 माजी नगरसेवक, आणि पदाधिकारी शिंदेसेनेत प्रवेश करणार असल्याच्या चर्चा आहेत. आजच्या कार्यक्रमात संगमेश्वरचे माजी आमदार सुभाष बने, राजापूरचे माजी आमदार गणपत कदम, जिल्हा परिषदेचे माजी अध्यक्ष रोहन बने शिंदेंच्या सेनेत प्रवेश असल्याचे बोलले जात आहे.