শিৱসাগৰঃ দেশৰ অন্যান্য প্ৰান্তৰ লগতে শিৱসাগৰতো আজি ৭৮ সংখ্যক স্বাধীনতা দিৱস উলহ মালহেৰে উদ্যাপন কৰা হয় ৷ শিৱসাগৰ বৰ্ডিং খেলপথাৰত জিলা প্ৰশাসনৰ উদ্যোগত উদ্যাপন কৰা স্বাধীনতা দিৱসৰ জাতীয় পতাকা উত্তোলন কৰে শিৱসাগৰ জিলা আয়ুক্ত আদিত্য বিক্ৰম য়াদৱে ৷ পতাকা উত্তোলন কৰি দিয়া ভাষণত আদিত্য বিক্ৰম য়াদৱে দেশৰ স্বাধীনতাৰ হকে প্ৰাণ আহুতি দিয়া শ্বহীদসকলক স্মৰণ কৰাৰ লগতে চৰকাৰে গ্ৰহণ কৰা আঁচনিসমূহৰ বিষয়ে উল্লেখ কৰে । ইয়াৰ পিছতে আৰক্ষী, অৰ্ধসামৰিক বাহিনী, ৰাষ্ট্ৰীয় শিক্ষাৰ্থী বাহিনীকে ধৰি কেইবাটাও প্লাটনে অংশগ্ৰহণ কৰা মাৰ্চপাচ প্ৰদৰ্শন কৰা হয় ৷ স্বাধীনতা দিৱসৰ লগত সংগতি ৰাখি কেইবাগৰাকী মুক্তিযোদ্ধা, সমাজৰ বিভিন্ন ক্ষেত্ৰত বৰঙণি আগবঢ়োৱা কেইবাগৰাকীও ব্যক্তিক জিলা প্ৰশাসনৰ তৰফৰ পৰা সম্বৰ্ধনা জ্ঞাপন কৰা হয় । লগতে বিভিন্ন ধৰণৰ সাংস্কৃতিক তথা বঁটা বিতৰণ অনুষ্ঠান আয়োজন কৰা হয় । বিয়লি বেলা শিৱসাগৰ জিলা প্ৰশাসন বনাম শিৱসাগৰ পুলিচ প্ৰশাসনৰ মাজত প্ৰীতি ফুটবল খেল আয়োজন কৰা হয়। উক্ত খেলত শিৱসাগৰ পুলিচ প্ৰশাসনে জয়লাভ কৰে ৷৷
