પેટલાદ તાલુકાના ધૈર્યપુરા ગામે આવેલી પ્રાથમિક શાળામાં ગુરુવારના રોજ શાળા પ્રવેશોત્સવ કાર્યક્રમ યોજાયો હતો. કાર્યક્રમની શરૂઆત પ્રાર્થનાગીત થી કરવામાં આવી હતી. ધૈર્યપુરા ગામના સરપંચ રહેમતમિયાં મલેકની અધ્યક્ષતામાં સમગ્ર કાર્યક્રમ યોજાયો હતો. કાર્યક્રમની શરૂઆતમાં પ્રવેશ મેળવનાર શાળાના બાળકોને શૈક્ષણિક કીટનું વિતરણ કરવામાં આવ્યું હતું. ત્યારબાદ શાળાના આચાર્ય બ્રિજેશભાઈએ પ્રાસંગિક ઉદબોધન કર્યું હતું. કેશવભાઈ સનાભાઇ ચૌહાણ દ્વારા શાળાના બાળકોને તિથિ ભોજન આપવામાં આવ્યું હતું. જિજ્ઞાસાબેન દ્વારા કાર્યક્રમના અંતે આભાર વિધિ કરવામાં આવી હતી.