শিৱসাগৰঃ ৰাজ্যৰ বিভিন্ন প্ৰান্তৰ লগতে শিৱসাগৰতো "দৃশ্যপট, শিৱসাগৰ'ৰ" উদ্যোগত "বিশ্ব ৰক্তদান দিৱস" উদ্যাপন কৰা হয় ৷ "বিশ্ব ৰক্তদান দিৱস"ৰ লগত সংগতি ৰাখি শিৱসাগৰ সাংস্কৃতিক আৰু সামাজিক সংস্থা "দৃশ্যপট, শিৱসাগৰ'ৰ" উদ্যোগত আৰু মাৰৱাড়ী যুৱ মঞ্চৰ শিৱসাগৰ প্ৰগতি শাখাৰ সহযোগত শিৱসাগৰৰ শৰ্মা নাছিং হোমত এক ৰক্তদান শিৱিৰৰ আয়োজন কৰা হয় । দৃশ্যপট, শিৱসাগৰৰ সভাপতি তথা জ্যেষ্ঠ নাট্যকৰ্মী ড° মণি পাঠকে আঁত ধৰা শিৱিৰৰ দুৱাৰ মুকলি কৰে শিৱসাগৰৰ সহকাৰী জিলা আয়ুক্ত শুভজিৎ খাউণ্ডে ৷ আনহাতে বন্তি প্ৰজ্বলন কৰে শৰ্মা নাছিং হোমৰ স্বত্বাধিকাৰ তথা শিৱসাগৰৰ বিশিষ্ট চিকিৎস্যক ডাঃ গিৰিৰাজ শৰ্মায়ে। উক্ত অনুষ্ঠানত শিৱসাগৰ অসামৰিক চিকিৎসালয়ৰ চিকিৎসক আৰু শিৱসাগৰ ৰক্ত ভঁৰালৰ তত্ত্বাবধায়ক ডাঃ দ্বিজেন কোঁচে ৰক্তদান সম্পৰ্কে ৰাইজক সজাগ কৰিবৰ কাৰণে এক সুন্দৰ বক্তৃতা প্ৰদান কৰাৰ লগতে ৰক্তদান যে এক মহান দান তাৰ সন্দৰ্ভতো ব্যাখ্যা কৰে । মাৰৱাড়ী যুৱ মঞ্চ, শিৱসাগৰ প্ৰগতি শাখাৰ সভানেত্ৰী পায়েল আগৰৱালাই এক সজাগতামূলক বক্তব্যৰে তেওঁলোকৰ উদ্দেশ্য সফল কৰিবলৈ ৰাইজলৈ আহ্বান জনায়। শিৱিৰত শিৱসাগৰ চহৰৰ ভালে সংখ্যক ব্যক্তি আৰু অনুষ্ঠান-প্ৰতিষ্ঠানৰ সদস্যই ৰক্তদান কৰে । "দৃশ্যপট, শিৱসাগৰ'ৰ" সম্পাদক অভিনৱ দেৱ কাশ্যপে প্ৰায় ৫০ ইউনিত ৰক্ত সংগ্ৰহ কৰি শিৱসাগৰৰ ৰক্ত ভঁৰাল টনকিয়াল কৰাৰ তেওঁলোকৰৰ প্ৰয়াস সফল হয় বুলি জানিবলৈ দিছে ৷
