સાબરકાંઠા જિલ્લાના ઇડરથી હિંમતનગર સ્ટેટ હાઈવે પર ગત રાત્રિના સમયે કાર અને ડમ્પર વચ્ચે અકસ્માત સર્જાયો હતો. હિંમતનગરથી કારમાં નેત્રામલી જતા પરિવારને ડાઈવર્ઝન કટ પર ઇડરથી હિંમતનગર તરફ પૂરઝડપે જતા ડમ્પરે અડફેટે લીધા હતા, જેમાં એક બાળકી સહિત ચારનાં મોત નીપજ્યાં હતાં, જ્યારે બે બાળકી સહિત ચારને ઈજાઓ થતાં સારવાર અર્થે હિંમતનગર ખસેડવામાં આવ્યાં હતાં. અકસ્માત અંગે જાદર પોલીસને જાણ થતાં ઘટનાસ્થળ બાદ હિંમતનગર સિવિલમાં પહોંચીને પોસ્ટમોર્ટમ અને ફરિયાદની કાર્યવાહી હાથ ધરી હતી.

આ અંગે જાદર પોલીસ સ્ટેશનથી મળેલી માહિતી મુજબ, ઇડરનો નેત્રામલીની જરીવાલા પરિવાર ગુરુવારે રાત્રિના સમયે હિંમતનગરમાં તેમના સંબધીને ત્યાં જન્મદિવસનો પ્રસંગ પૂર્ણ કરીને ત્રણ બાળકો સહિત પરિવાર કાર નં MH.02.CV.6823 માં નેત્રામલી જવા નીકળ્યો હતો. તે દરમિયાન 11 કલાકની આસપાસ નેત્રામલીથી ચાર કિમી દૂર દરામલી પાસે સ્ટેટ હાઈવે પર સમારકામ ચાલી રહ્યું છે.

 જેથી દિવ્ય ચેતના કોલેજ આગળ આપેલા ડાઈવર્ઝન તરફ જતા સમયે ઇડર તરફથી માતેલા સાંઢની જેમ ડમ્પર અને કાર અથડાતાં ગમખ્વાર અકસ્માત સર્જાયો હતો. એને લઈને કારમાંથી પરિવારજનો રોડ પર ફેંકાયાં હતાં. અકસ્માતને લઈને આવતા-જતા વાહનચાલકો અને આજુબાજુના લોકો દોડી આવ્યા હતા. અકસ્માતમાં એક બાળકી સહિત ચારનાં ઘટનાસ્થળે જ મોત નીપજ્યાં હતાં. તો બે બાળકી સહિત ચાર ઈજાગ્રસ્તોને તાત્કાલિક સારવાર અર્થે હિંમતનગર સિવિલ હોસ્પિટલમાં ખસેડવામાં આવ્યાં હતાં. અકસ્માતમાં કારમાં ફસાયેલા મૃત ચાલકને લોકોએ દરવાજો તોડી બહાર કાઢ્યો હતો.

અકસ્માત અંગે 108 અને જાદર પોલીસને જાણ થતાં રાત્રિના સમયે તાત્કાલિક ઘટનાસ્થળે પહોંચ્યા હતા અને ઈજાગ્રસ્તોને સારવાર અર્થે હિંમતનગર સિવિલ હોસ્પિટલમાં ખસેડવામાં આવ્યા હતા. ત્યાર બાદ પોલીસે રોડ પરથી વાહનો હટાવીને ટ્રાફિક પૂર્વવત્ કર્યો હતો. બીજી તરફ પોલીસે સ્થળ બાદ હિંમતનગર સિવિલ હોસ્પિટલમાં પહોંચીને પોસ્ટમોર્ટમ અને ફરિયાદની કાર્યવાહી હાથ ધરી હતી.

અકસ્માતમાં મૃત્યુ પામેલા લોકોની યાદી

1.સ્વપ્નિલ કમલેશભાઈ જરીવાલા (ઉં.34 વર્ષ)

2.પ્રજ્ઞાબેન કમલેશભાઈ જરીવાલા (ઉં.52 વર્ષ)

3.જીલબેન જૈનિલકુમાર જરીવાલા (ઉં.31 વર્ષ)

4.દેલિશાબેન જૈનિલકુમાર જરીવાલા (ઉં.7 મહિના)

અકસ્માતમાં ઈજાગ્રસ્ત થયેલા લોકોની યાદી

કમલેશભાઈ વિઠ્ઠલભાઈ જરીવાલા (ઉં.54 વર્ષ)

વિધિબેન સ્વપ્નિલભાઈ જરીવાલા (ઉં.30 વર્ષ)

હેઝલબેન જૈનિલકુમાર જરીવાલા (ઉં.3 વર્ષ)

મયેશા જૈનિલ જરીવાલા (ઉં. 3 મહિના)

તમામ મૂળ રહે. નેત્રામલી હાલ રહે. બોમ્બે