মৰাণ লাচিত নগৰৰ নিবাসী, বিশিষ্ট বিজ্ঞানী, অধ্যাপক তথা অসম পেট্র’কেমিলছৰ অৱসৰপ্ৰাপ্ত কার্যবাহী সঞ্চালক, বিশিষ্ট সমাজকর্মী ড° মহেন্দ্ৰ বৰগোহাঞিৰ মৃত্যুত শোকৰ ছাঁ । হায়দৰাবাদৰ এখন চিকিৎসালয়ত চিকিৎসাধীন অৱস্থাত মৃত্যুক সাৱতি লোৱাৰ পিছত আজি নশ্বৰ দেহ মৰাণৰ নিজা বাসগৃহলৈ লৈ অনা হয় । অসম পেট্ৰ'কেমিকেলছত দীর্ঘদিন ধৰি কাৰ্যবাহী সঞ্চালক পদত কাৰ্যনিৰ্বাহ কৰা ব্যক্তিজনে ১৯৯৯ চনত অৱসৰ গ্ৰহণ কৰে । ছাত্র অৱস্থাৰে পৰা কাব্যচৰ্চা আৰম্ভ কৰা ড° বৰগোহাঞিৰ প্ৰকাশিত কবিতা পুথি হৈছে 'হিয়াৰ হাৰ' । বিভিন্ন শৈক্ষিক, সামাজিক অনুষ্ঠানৰ সৈতেও জড়িত আছিল ড° বৰগোহাঞি । অসমৰ প্ৰাক্তন মুখ্যমন্ত্ৰী তৰুণ গগৈৰ ভগ্নী বুলবুল গগৈ বৰগোহাঞিৰ সৈতে বিবাহপাশত আবদ্ধ হৈছিল ড° বৰগোহাঞি । মৃত্যুৰ সময়ত বিশিষ্ট বিজ্ঞানীজনে পৰিয়ালত দুজন পুত্র আৰু দুই কন্যাক এৰি থৈ গৈছে । ড° বৰগোহাঞিৰ মৃত্যুৰ পিছতে তেঁওৰ বাসগৃহত উপস্থিত হৈ বিভিন্ন অনুষ্ঠান-প্ৰতিষ্ঠানে গভীৰ শোক প্রকাশ কৰাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিছে ।