કુડા રણમાંથી વિદેશી દારૂ ભરેલી સફેદ કલરની કાર નિમકનગર તરફ આવતી હોવાની બાતમીના આધારે તાલુકા પોલીસે કુડા નિમકનગર નજીકથી ફોરવીલ કારમાંથી વિદેશી દારૂ ઝડપાયો હતો. જેમાં નાની મોટી બોટલ કિંમત,1,96,200 અને કાર સહિત રૂ.16,96,200 મુદ્દામાલ ઝડપી પાડી કારના માલિક સામે ગુનો નોંધાયો હતો. ધ્રાંગધ્રા પોલીસ દ્વારા દારૂની ડ્રાઇવનું આયોજન હાથ ધરાયું છે. ત્યારે ધ્રાંગધ્રા તાલુકા પોલીસ કોસ્ટેબલ દેવજીભાઈ પરસોત્તમભાઈ વાઘેલાને કુડા રણમાંથી એક સફેદ કલરની કારમાં વિદેશી દારૂના જથ્થા બાબતે ખાનગી રાહે બાતમી મળી હતી. આથી તાલુકા પોલીસના હેડ કોસ્ટેબલ, દેવજીભાઈ વાઘેલા, કુલદીપ સિંહ ઝાલા,વિક્રમભાઈ રબારી, શક્તિસિંહ સિંધવ સહિત સ્ટાફ દ્વારા કુડા નિમકનગર નજીક સફેદ કલરની કાર આવતા કુડા નિમકનગર બેઠા નાળા નીચે થઈને બાવળની વાડમાં કાર મૂકીને આરોપી નાસી છૂટ્યો હતો. પોલીસે કારમાં ચેક કરાતા વિદેશી દારૂ અને બીયરની અલગ અલગ બ્રાન્ડની બોટલો અને કાર સહિત કુલ રૂ. 16,96,200નો મુદ્દામાલ ઝડપી કારના માલિક સામે કાર્યવાહી હાથ ધરી હતી. આ બનાવમાં વધુ તપાસ ધાંગધ્રા તાલુકા પોલીસ ચલાવી રહી છે.