ડીસામાં રખડતા ઢોરોનો ત્રાસ હજુ પણ યથાવત છે. જેમાં આજે પાલનપુરથી સાંચોર તરફ જઈ રહેલ કાર અચાનક રસ્તા વચ્ચે આવી ગયેલ આખલાને ટકરાતા અકસ્માત સર્જાયો હતો. અકસ્માતમાં કારના આગળના ભાગનો કચ્ચરઘાણ નીકળી ગયો હતો.
ડીસા-પાલનપુર નેશનલ હાઈવે પર રખડતા પશુના કારણે આજે વધુ એક અકસ્માત સર્જાયો છે. જેમાં એક માળી પરિવાર કાર લઈને પાલનપુરથી સાંચોર તરફ જઈ રહ્યા હતા અને ડીસા પાસેથી પસાર થઈ રહ્યા હતા. તે સમયે ભોયણ પાસે અચાનક રસ્તા વચ્ચે આખલો આવી જતા કાર આખલાને ટકરાતા ધડાકાભેર અકસ્માત સર્જાયો હતો.
અકસ્માતમા કારમાં બેઠેલ પાંચ લોકોની આબાદ બચાવ થયો હતો. જ્યારે એક પાંચ વર્ષના બાળકને સામાન્ય ઇજા પહોંચી હતી. બનાવને પગલે આજુબાજુના લોકો દોડી આવી રાહત કામગીરી શરૂ કરી હતી.
