দলগাঁৱৰ বিধায়ক মজিবুৰ ৰহমান এইবাৰ আহতৰ কাষত । শ্যামপুৰৰ খেৰণি চাপৰিত বাঘৰ আক্ৰমণত আহত হৈছিল চাৰিজনকৈ লোক । আহত সকলৰ খবৰ লবলৈ খেৰণি চাপৰি গাঁৱত উপস্থিত হয় বিধায়ক মজিবুৰ ৰহমান । এসপ্তাহ পূৰ্বে দৰঙৰ ওৰাং ৰাষ্ট্ৰীয় উদ্যানৰ পৰা ওলাই অহা এটা নাহৰফুটুকী বাঘ শ্যামপুৰ আৰক্ষী থানাৰ অন্তৰ্গত খেৰণি চাপৰি গাঁৱত প্ৰৱেশ কৰি সন্ত্ৰাসৰ সৃষ্টি কৰিছিল । গাঁও খনৰ চাৰি জনকৈ লোক বাঘটোৰ আক্ৰমণত গুৰুতৰ ভাৱে আহত হৈ মঙলদৈ আৰু গুৱাহাটীত চিকিৎসাধীন অৱস্থাত আছিল । আহত হৈছিল খেৰণী চাপৰি গাঁৱৰ ফৈজুদ্দিন , আজাহাৰ আলী , আবুতালেব আৰু চাহেদ আলী । আহত সকলে লাভ কৰা‌ নাছিল কোনো ধৰণৰ চৰকাৰী ক্ষতিপূৰণ । শনিবাৰে খেৰণি চাপৰি গাঁৱত বিধায়ক মজিবুৰ ৰহমান আহত লোক সকলৰ খবৰ লোৱাৰ লগতে ব্যক্তিগত ভাৱে চাৰিজন আহতক ২৫ হাজাৰ টকা প্ৰদান কৰে । ফৈজুদ্দিক ১০ হাজাৰ আৰু বাকী তিনি জন আহতক ৫ হাজাৰ কৈ টকা প্ৰদান কৰে । বন মন্ত্ৰী তথা বন বিভাগৰ উচ্চ পৰ্যায়ৰ বিষয়াৰ সৈতে আলোচনা মৰ্মে আহত সকলক ক্ষতিপূৰণ লৈ দিয়াৰ আশ্বাস প্ৰদান কৰে বিধায়ক মজিবুৰ ৰহমানে । উল্লেখযোগ্য যে , ওৰাং ৰাষ্ট্ৰীয় উদ্যানৰ উক্ত এলেকাত কাটাতাৰৰ বেৰ নথকাৰ বাবেই প্ৰায়েই গঁড় , বাঘ , গাহৰি ওলাই আহি বিভিন্ন ধৰণৰ ক্ষতি সাধন কৰিছে অঞ্চল খনত । ৰাষ্ট্ৰীয় উদ্যান খনৰ কাটাতাৰৰ বেৰ দিবলৈ বিধায়ক গৰাকীক আহ্বান জনাইছে স্থানীয় ৰাইজে । বিধায়ক মজিবুৰ ৰহমানে সাংবাদিকক জানিবলৈ দিয়ে যে , ওৰাং ৰাষ্ট্ৰীয় উদ্যান খেৰণি চাপৰি গাঁৱৰ মাজেৰে বৈ যোৱা ধনশিৰী নৈৰ গৰাখহনীয়াৰ ফলত বন বিভাগে দিয়া কাটাতাৰৰ বেৰ নাথাকে । নদী খনৰ গৰাখহনীয়া প্ৰতিৰোধ কৰাৰ বাবে বিধানসভাৰ মজিয়াত দাবী উত্থাপন কৰিব ।