બનાસકાંઠામાં ડીસા-પાટણ હાઈવે પર આજે વધુ એક અકસ્માતની ઘટના સર્જાઈ હતી. મોડી રાત્રે જુનાડીસા પાસે રીક્ષા ડીવાઈડરને ટકરાતા પલટી ખાઇ જતા અકસ્માત સર્જાયો હતો. જેમાં એક જ સમાજના ત્રણ લોકોને ગંભીર ઇજા પહોંચતા સારવાર માટે સરકારી હોસ્પિટલમાં ખસેડાયા હતા.

ડીસા-પાટણ હાઇવે પરથી આજે એક રીક્ષા પસાર થઈ રહી હતી અને રિક્ષામાં સવાર વાદી સમાજના ત્રણ લોકો જુનાડીસા પાસેથી પસાર થઈ રહ્યા હતા. તે સમયે અચાનક રીક્ષા ચાલકે સ્ટેયરીંગ પરથી કાબુ ગુમાવતા રીક્ષા ડિવાઈડરને ટકરાઈ હતી અને ડિવાઈડરને ટકરાયા બાદ રીક્ષા પલટી ખાઈ જતા અકસ્માત સર્જાયો હતો.

અકસ્માતમાં રીક્ષા ચાલક અને બે મહિલાઓને ગંભીર ઈજા પહોંચી હતી. ઘટનાને પગલે આજુબાજુના લોકો દોડી આવી ઇજાગ્રસ્તોને રિક્ષામાંથી લોહીલુહાણ હાલતમાં બહાર કાઢ્યા હતા.

આ ઘટનાની જાણ થતાં જ 108 એમ્બ્યુલન્સ વાનની ટીમ પણ અકસ્માત સ્થળે પહોંચી હતી અને તમામ ઇજાગ્રસ્ત લોકોને સારવાર માટે ડીસાની સરકારી હોસ્પિટલમાં ખસેડ્યા હતા. એક જ વાદી સમાજના ત્રણ લોકોને ગંભીર ઈજા પહોંચતા સમાજના લોકોના ટોળેટોળા હોસ્પિટલમાં ઉમટ્યા હતા.