ভুমিপুত্ৰ দেউৰীসকলক আজি বহাগ বিহু উৰুকা ৷ পৰম্পৰা ৰীতি নীতি অনুসৰি বহাগ মাহৰ প্ৰথমটো বুধবাৰে দেউৰী জনগোষ্ঠীয় লোকসকলে পালন কৰে বিচুৰ উৰুকা ৷ অসমৰ সৰ্ববৃহৎ দেউৰী লোকৰ বসতিস্থল নাৰায়ণপুৰত উৰুকাৰ দিনটোত বিয়লি বেলাৰ পৰা গাঁও বা চুবুৰীৰ মুখীয়াল বা পুজাৰীৰ ঘৰত ডেকা গাভৰু সকলো একগোট হৈ ওৰে নিশা লহৰীয়া গাই পাৰ কৰিব ৷ হাতে হাত ধৰি সকলোৱে লহৰীয়া গাব ৷ এসময়ত পাহাৰীয়া আবৰ জাতিক ভয়ত দেউৰীসকল নিশা হ’লে মুখীয়ালৰ ঘৰত একগোট হৈ ওৰেৰাতি হাতে হাত ধৰি লহৰীয়া গাই নিজক ৰক্ষা কৰিছিল ৷ স্বকীয় পৰম্পৰা আৰু বৈশিষ্ট্যৰে নাৰায়ণপুৰত দেউৰীসকলে আজি পালন কৰিছে বহাগ বিহুৰ উৰুকা ৷