ડીસા શહેરમાં આવેલ ભગવતી સર્કલથી લેખરાજ ચાર રસ્તા વચ્ચે શાકમાર્કેટની આગળ ચાલુ બાઇકમાં આગ ભભૂકી ઉઠતાં લોકોમાં દોડધામ મચી ગઇ હતી. જ્યારે ડીસામાં એક જ માસમાં હીરો કંપનીની બીજી બાઇક સળગવાની ઘટના સામે આવી છે. ત્યારે આ બાઇક કયા કારણોસર સળગી તે હજુ જાણવા મળ્યું નથી.
આ અંગેની વિગત એવી છે કે, ડીસાના લેખરાજ ચાર રસ્તાથી ભગવતી સર્કલ તરફ બાઇક જઇ રહી હતી. તે દરમિયાન મોહન સાઇકલની દુકાન આગળ બાઇક આવતાં અચાનક આગ ભભૂકી ઉઠતાં ચાલકે બાઇકને ત્યાં જ ઉભી કરી દૂર દોડી ગયા હતા. ત્યારે ચાલકનો આબાદ બચાવ થયો હતો અને ઘટનાસ્થળે લોકોના ટોળેટોળા એકત્ર થઇ ગયા હતા.
ત્યારે લોકોએ સતત પાણીનો મારો ચલાવવા છતાં આગ કાબૂમાં ન આવતાં ડીસા ફાયર- ફાઇટર વિભાગને જાણ કરાઇ હતી અને તાત્કાલીક ફાયર-ફાઇટર વિભાગની ટીમ દોડી આવી સતત પાણીનો મારો ચલાવી આગને કાબૂમાં લીધી હતી. ત્યારે હીરો કંપનીની બાઇક એક જ માસમાં સળગવાની બીજી ઘટના સામે આવતાં લોકોમાં અનેક ચર્ચાઓ થવા લાગી હતી.
