অহা ৩০ এপ্ৰিল, ১ আৰু ২ মে'ত ৬২ সংখ্যক গোলাঘাট কেন্দ্ৰীয় ৰঙালী বিহু সন্মিলনঃ উদযাপন সমিতি গঠন।ৰাজ্যখনৰে ঐতিহ্যমণ্ডিত গৌৰৱময় ৬১ টা বছৰ গৰকা গোলাঘাট কেন্দ্ৰীয় ৰঙালী বিহু সন্মিলনখনি অহা ৩০ এপ্ৰিল,১ আৰু ২ মে'ত তিনিদিনীয়া বৰ্ণাঢ্য কাৰ্যসূচীৰে অনুষ্ঠিত হ'ব । গোলাঘাট সমন্বয় ক্ষেত্ৰৰ মুকলি মঞ্চত বিগত বৰ্ষৰ ৰঙালী বিহু সন্মিলনৰ উদযাপন সমিতিৰ সভাপতি পূৰ্ণ ৰাজখোৱাৰ পৌৰাহিত্যত বিশাল ৰাজহুৱা সভা অনুষ্ঠিত হৈ যায় । সভাৰ উদ্দেশ্য ব্যাখ্যা কৰে বিগত বৰ্ষৰ উদযাপন সমিতিৰ অন্যতম সাধাৰণ সম্পাদক নিৰঞ্জন সোণোৱালে । বিস্তৃতভাৱে সম্পাদকীয় প্ৰতিবেদন পাঠ কৰে ৬১ সংখ্যক গোলাঘাট কেন্দ্ৰীয় ৰঙালী বিহু সন্মিলনৰ সাধাৰণ সম্পাদক দিগন্ত কুমাৰ ভূঞাই । বিত্তীয় প্ৰতিবেদন পাঠ কৰে বিগত বৰ্ষৰ কেন্দ্ৰীয় ৰঙালী বিহু সন্মিলনৰ কাৰ্যকৰী সভাপতি দেৱজিৎ ফুকনে । হিচাপ পৰীক্ষকৰ প্ৰতিবেদন পাঠ কৰে আভ্যন্তৰীণ হিচাপ পৰীক্ষক ঋতুপল্লৱ শইকীয়াই । সম্পাদকীয় প্ৰতিবেদন,বিত্তীয় প্ৰতিবেদ,হিচাপ পৰীক্ষকৰ প্ৰতিবেদনৰ ওপৰত সভাত আলোচনা হোৱাৰ অন্তত সৰ্বসন্মসন্মতিক্ৰমে গৃহীত কৰে । প্ৰায় ৪৩ হাজাৰ ৰাহি ধনেৰে আগবঢ়োৱা প্ৰতিবেদনৰ সভাত সমবেত সকলোৱে একমুখে প্ৰশংসা কৰি উদযাপন সমিতিৰ সভাপতি,কাৰ্যকৰী সভাপতি,সাধাৰণ সম্পাদকদ্বয়ক ধন্যবাদ জ্ঞাপন কৰে । সভাত বিশিষ্ট শিক্ষাবিদ বীৰেণ শৰ্মা, গোলাঘাট হেমপ্ৰভা বৰবৰা ছোৱালী মহাবিদ্যালয়ৰ প্ৰাক্তন অধ্যক্ষ ড° বন্তিৰাণী ফুকন,অসম ক্ৰিকেট সন্থাৰ প্ৰাক্তন উপ-সভাপতি পৰিক্ষীত দত্ত, জীনা বৰুৱা,সমাজকৰ্মী পৱন শইকীয়া, সদৌ অসম ছাত্ৰ সন্থাৰ কেন্দ্ৰীয় সহকাৰী সাধাৰণ সম্পাদক অভিৱৰ্তন গোস্বামী,সন্মিলনৰ প্ৰাক্তন কাৰ্যকৰী সভাপতি দ্বীজেন বৰা আদিয়ে বিভিন্ন পৰামৰ্শ আগবঢ়ায় । সভাত পৰিক্ষীত দত্তক সভাপতি,শান্তনু শইকীয়াক কাৰ্যকৰী সভাপতি,অভিৱৰ্তন গোস্বামী,পাৰ্থজ্যোতি বৰাক সাধাৰণ সম্পাদক হিচাপে লৈ ৬২ সংখ্যক গোলাঘাট কেন্দ্ৰীয় ৰঙালী বিহু সন্মিলনৰ উদযাপন সমিতি গঠন কৰে । সন্মিলনৰ অন্তিম দিনৰ কাৰ্যসূচী ২ মে'ত সাংস্কৃতিক সন্ধিয়াত জনপ্ৰিয় কণ্ঠশিল্পী জুবিন গাৰ্গে অংশগ্ৰহণ কৰিব ।