আজি নাজিৰাত নিপুণ অসমৰ অভিযানৰ অধীনত বুনিয়াদী সাক্ষৰতা আৰু সাংখ্যিকতাৰ প্ৰশিক্ষণ । শিৱসাগৰ জিলাৰ নাজিৰা শিক্ষা খণ্ডৰ অন্তৰ্গত শিৱবাৰী বাগিচা প্ৰাথমিক বিদ্যালয়ত ন-পাম বাৰুৱতী আৰু নামদাং মণ্ডল সমল কেন্দ্ৰৰ মুঠ ৫২ গৰাকী শিক্ষকক ১৫ মাৰ্চৰ পৰা ১৮ মাৰ্চলৈ ৪ দিনীয়াকৈ নিপুণ অসম অভিযানৰ অধীনত বুনিয়াদী সাক্ষৰতা আৰু সাংখ্যিকতাৰ প্ৰশিক্ষণ প্ৰদান কৰা হৈছে। ছাত্ৰ-ছাত্ৰী সকলক বুনিয়াদী সাক্ষৰতা আৰু সাংখ্যিকতা জ্ঞানৰ ক্ষেত্ৰত উন্নত পাঠদানৰ উদ্দেশ্যে এই প্ৰশিক্ষণৰ কাৰ্যসূচী গ্ৰহণ কৰা হৈছে বুলি জানিবলৈ দিয়ে ন-পাম বাৰুৱতী মণ্ডলৰ সমন্বয়ক হিতেশ্বৰ কোঁৱৰে। বন্তি প্ৰজ্বলনেৰে শুভাৰম্ভণি কৰে শিৱবাৰী বাগিচা প্ৰাথমিক বিদ্যালয়ৰ প্ৰধান শিক্ষক ৰিখেশ্বৰ গগৈয়ে । শিক্ষক সকলৰ সংকল্প গ্ৰহণৰ পাছতে আৰম্ভ হয় এই প্ৰশিক্ষণ কাৰ্যসূচী। উক্ত প্ৰশিক্ষণ কাৰ্যসূচীত সমল ব্যক্তি হিচাপে দায়িত্ব সম্পাদন কৰে অংগনা চেলেং আৰু প্ৰিয়াংকী বৰুৱাই। এই প্ৰশিক্ষণ গ্ৰহণৰ জৰিয়তে ছাত্ৰ ছাত্ৰী সকলৰ ভাষীক আৰু সাংখ্যিকতাৰ ক্ষেত্ৰত উন্নত পাঠদান সম্ভৱ হ'ব বুলি আশা ব্যক্ত কৰি অসমৰ শিক্ষা বিভাগক কৃতজ্ঞতা জনায় শিক্ষক সকলে।নিপুণ অসম কাৰ্যসূচীৰ খণ্ড সমল ব্যক্তি জ্যোতি ফুকন আৰু নাজিৰা প্ৰাথমিক শিক্ষক সন্মিলনীৰ সম্পাদক শৈলেন কলিতা উপস্থিত থাকে এই প্ৰশিক্ষণ কাৰ্যসূচীত।