কাবুল, ০৬ আগষ্ট। আফগানিস্তানৰ ৰাজধানী কাবুলৰ শিয়া সংখ্যাগৰিষ্ঠ পিডি ৬ৰ চৰকাৰী আৱাসিক এলেকাত শুকুৰবাৰে নিশা সংঘটিত এক শক্তিশালী বোমা বিস্ফোৰণত আঠজন লোক নিহত আৰু ১৮ জন আহত হয়।
কাবুল আৰক্ষীৰ মুখপাত্ৰ খালিদ জাদৰানে কৈছে যে বিস্ফোৰক এখন গাড়ীত ৰখা হৈছিল। ঘটনাস্থলীত উপস্থিত থকা সকলে কয় যে হতাহতৰ সংখ্যা যথেষ্ট বেছি। এই বিস্ফোৰণৰ দায়িত্ব ইছলামিক ষ্টেটে স্বীকাৰ কৰিছে। স্থানীয় প্ৰশাসনৰ মতে, বিস্ফোৰণৰ পিছত সমগ্ৰ অঞ্চলটোত অনুসন্ধান অভিযান চলোৱা হৈছে। আহতসকলক চিকিৎসাৰ বাবে চিকিৎসালয়লৈ প্ৰেৰণ কৰা হৈছে। আফগানিস্তানত তালিবানৰ প্ৰত্যাৱৰ্তনৰ লগে লগে ইছলামিক ষ্টেটে ইয়াৰ উপস্থিতি বৃদ্ধি কৰিছে।
আমেৰিকা যুক্তৰাষ্ট্ৰৰ যুটীয়া চীফ অফ ষ্টাফৰ অধ্যক্ষ জেনেৰেল মাৰ্ক মিলিয়েও সতৰ্ক কৰি দিছিল যে ইছলামিক ষ্টেট আৰু আন কেইবাটাও সন্ত্ৰাসবাদী গোটে আফগানিস্তানত পুনৰ গোট খাবলৈ চেষ্টা কৰি আছে। সন্ত্ৰাসবাদী দলটোৱে আফগানিস্তানত বৃদ্ধি হোৱা ড্ৰাগস সৰবৰাহৰ পৰা ইয়াৰ গোটটোৰ বাবে পুঁজি সংগ্ৰহ কৰিব পাৰে। অৱশ্যে আইএছআইএছে আফগানিস্তানত খোপনি পোতাৰ কথা তালিবানে অস্বীকাৰ কৰিছিল। তালিবানৰ দাবী স্বত্বেও, আইএছআইএছে যোৱা এবছৰত আফগানিস্তানত কেইবাটাও সন্ত্ৰাসবাদী আক্ৰমণৰ দায়িত্ব স্বীকাৰ কৰিছে।
