પોરબંદરથી અમદાવાદ વાયા જેતલસર સુધી નવી સ્પેશ્યલ ઇન્ટરસિટી ટ્રેન શરૂ કરો
સાંસદ રમેશભાઈ ધડુકે કેન્દ્રીય રેલમંત્રીને કરી રજુઆત
પોરબંદરના સાંસદ રમેશભાઈ ધડુકે ભારત સરકારના રેલ મંત્રી અશ્વિની વૈષ્ણવને પત્ર પાઠવી જણાવ્યું છે કે, વડાપ્રધાનના નેતૃત્વમાં ભારતીય રેલ્વે નેટવર્કમાં જબરદસ્ત વૃદ્ધિ જોવા મળી છે. અને નરેન્દ્ર મોદીના સક્ષમ નેતૃત્વ હેઠળ રેલ્વે મંત્રાલયે સલામતી સુધારણા માટે ઘણા પગલાં લીધા છે, જેમાં રેલ્વે ટ્રેકનું મોટા પાયે નવીનીકરણ, વિદ્યુતીકરણ, અસરકારક ટ્રેક જાળવણી, સલામતીના પાસાઓનું કડક નિરીક્ષણ, મુસાફરોની સુવિધાઓ સહિત ખોરાક, સુરક્ષા કાર્યો વગેરેનો સમાવેશ થાય છે. આધુનિક ટેક્નોલોજીનો ઉપયોગ અને પીવાના પાણીની ગુણવત્તામાં વધારો અને સિગ્નલિંગ સિસ્ટમમાં સેનિટરી સુધારણા પણ સામેલ છે. રાજકોટ, જૂનાગઢ, પોરબંદર, સોમનાથ, જામનગર અને દેવ-ભૂમિ દ્વારકા જિલ્લાઓ ગુજરાતની પશ્ચિમ અને દક્ષિણ દિશામાં મોજૂદ છે. આ તમામ જિલ્લાઓમાંથી પોરબંદર એશિયાનો એકમાત્ર એવો જિલ્લો છે, કે જેના મુસાફરોને અમદાવાદ પહોંચવા માટે દિવસ દરમિયાન એક પણ ટ્રેનની સુવિધા નથી. આ સુવિધા કોરોના રોગચાળા પહેલા કાર્યરત હતી. પોરબંદરની બહાર કામ અર્થે જતા નાગરિકો અને વેપારીઓને તેનો લાભ મળતો હતો, આજે પણ તે લોકોને અમદાવાદ જવા માટે રેલની સુવિધા નથી. રેલ્વે મંત્રાલયના આ નિર્ણયથી ગોંડલ-ધોરાજી ઉપલેટાના અંદાજે ૮ થી ૧૦ લાખ મુસાફરોને સૌથી વધુ અસર થઈ રહી છે, કારણ કે આ વિસ્તારમાં મોતી પાનેલી, નવાગઢ, ભાયાવદર, ગોંડલ, જેતલસર, ઉપલેટા અને ધોરાજી જેવા મોટા સ્ટેશનો આવેલા છે. પોરબંદરથી રાજકોટ માટે ૩૦ થી વધુ ટ્રેનો માંથી માત્ર ૨ ટ્રેન જેતલસર જંકશન થઈને રાજકોટ જાય છે, જે શહેરીજનો અને અન્ય લાખો મુસાફરોને અન્યાય સમાન છે. ઉપરાંત સોમનાથથી અમદાવાદ જતી પેસેન્જર ટ્રેનમાં ટ્રાફિક વધુ હોવાથી મુસાફરોને જેતલસર જંકશનથી રાજકોટ વાયા અમદાવાદ જવા માટે ટ્રેનમાં ઉભા પણ રહેવું પડતું નથી, જેના કારણે શહેરીજનો અને મુસાફરોને ભારે હાલાકી ભોગવવી પડે છે. જેથી લોકોની માંગને ધ્યાનમાં રાખીને પોરબંદરથી અમદાવાદ વાયા જેતલસર સુધીની નવી સ્પેશિયલ ઇન્ટરસિટી ટ્રેન વહેલી તકે શરૂ કરવા યોગ્ય કાર્યવાહી કરવા માંગ કરાઇ છે.
