নাৰায়ণপুৰৰ ঐতিহ্যমণ্ডিত বৰখামতি পথাৰ খ্যাত মণিকাঞ্চন ক্ষেত্ৰত অনুষ্ঠিত হ’ব লগীয়া অসম সাহিত্য সভাৰ ষষ্ঠসপ্ততিতম পূৰ্ণাংগ অধিৱেশনৰ আজি লাই খুটা স্থাপন কৰা হয় ৷ লখিমপুৰ জিলাৰ উদ্যোগত আৰু ধেমাজী , বিশ্বনাথ আৰু মাজুলী জিলাৰ সহযোগত অহা ৩১ জানুৱাৰীৰ পৰা ৪ ফ্ৰেব্ৰুৱাৰীলৈকে অনুষ্ঠিত হ’ব লগা অসম সাহিত্য সভাৰ পূৰ্ণাংগ অধিৱেশন খনৰ আজি পুৱাৰে পৰা লাই খুটা স্থাপনৰ মাংগলিক অনুষ্ঠান আৰম্ভ হয় পতাকা উত্তোলনেৰে ৷ নাৰায়ণপুৰৰ ঐতিহাসিক বৰখামতি পথাৰৰ মণিকাঞ্চন ক্ষেত্ৰত পতাকা উত্তোলন কৰে উদযাপন সমিতিৰ সভাপতি অমিয় কুমাৰ ভূঞাই ৷ মুল পতাকা উত্তোলন কৰাৰ লগতে ৭৬ খন পতাকা উত্তোলন কৰা হয় ৷ ৭৬ গৰাকী শিল্পীৰ দ্বাৰা গায়ন-বায়ন একেদৰে ৭৬ গৰাকী শিল্পীয়ে জাতীয় সংগীত অ’ মোৰ আপোনাৰ দেশ পৰিৱেশন কৰাৰ উপৰিও চিৰ চেনেহী মোৰ ভাষা জননী গীত পৰিৱেশন কৰে ৷ পৰৱৰ্তী কাৰ্যসুচী অনুসৰি নাম কীৰ্তনৰ অন্তত দহ বজাত লাই খুটা স্থাপন কৰা হয় ৷ অনুষ্ঠানত উপস্থিত থাকে অসম চৰকাৰৰ পৰ্যটন আৰু জনস্বাস্থ্য কাৰীকৰি বিভাগৰ মন্ত্ৰী জয়ন্তমল্ল বৰুৱা , অসম সাহিত্য সভাৰ প্ৰধান সম্পাদক যাদৱ চন্দ্ৰ শৰ্মা আৰু কেইবাগৰাকী সত্ৰাধিকাৰ , ধৰ্মীয় গুৰু আৰু সাহিত্য সভাৰ বিষয়ববীয়াসকল ৷