১৯৯১ ৰ ২১ জুলাইত জন্ম গ্ৰহন কৰা সদৌ অসম মহিলা কৰ্মচাৰী সন্থাৰ নৱম ত্ৰি - বাৰ্ষিক অধিৱেশন খন এই বাৰ মৰাণত অহা ১০ আৰু ১১ ডিচেম্বৰত অনুষ্ঠিত হ'ব । এই উপলক্ষে ইতিমধ্যে ড° মামণি ফুকন বৰগোহাঁইক সভানেত্ৰী , ড° নিশি বৰগোহাঁইক কাৰ্যকৰী সভানেত্ৰী , জ্যোতি দেউৰীক সাধাৰণ সম্পাদিকা হিচাপে লৈ বহু কেইখন উপসমিতিৰ সৈতে এখন শক্তিশালী অভ্যৰ্থনা সমিতি গঠন কৰা হৈছে । কাৰ্যসূচী অনুসৰি ১০ ডিচেম্বৰৰ পুৱা ৮-৩০ বজাত সন্থাৰ পতাকা উত্তোলন কৰিব সদৌ অসম মহিলা কৰ্মচাৰী সন্থাৰ সভানেত্ৰী ড° ভানুপ্ৰভা শইকীয়াই । ইয়াৰ পাচতে অভ্যৰ্থনা সমিতিৰ পতাকা লগতে সদৌ অসম মহিলা কৰ্মচাৰী সন্থাৰ ৩২ খন পতাকা উত্তোলন কৰা হ'ব ।পুৱা ৯ বজাত স্মৃতি তৰ্পন কৰিব সন্থাৰ প্ৰাক্তন উপদেষ্টা ছৈয়দা নুৰজাহানে । পুৱা ৯ - ৩০ বজাত সাংস্কৃতিক শোভাযাত্ৰা উদ্বোধন কৰিব লোক সংস্কৃতিৰ গৱেষক ড° অনিল শইকীয়াই । পুৱা ১০ -৩০ বজাত বিয়ানাম আৰু উৰুলি প্ৰতিযোগিতা উদ্বোধন কৰিব মৰাণ মহাবিদ্যালয়ৰ অধ্যক্ষা ড° মিতালী কোঁৱৰে । প্ৰদৰ্শনী দ্বাৰ উন্মোচন কৰিব মৰাণ মহিলা মহাবিদ্যালয়ৰ অধ্যক্ষা জয়শ্ৰীফুকনে । ১১ নবেম্বৰত পুৱা ৯ - ৩০ বজাত " মহিলা কৰ্মচাৰীৰ সমস্যা আৰু আইনী সুৰক্ষা " আলোচনা চক্ৰখনত মুখ্য আলোচক হিচাপে ভাগ লব অধিবক্তা ড° নাজৰাণা আহমেদ আৰু ডিব্ৰুগড় জিলা বিদ্যালয়সমূহৰ পৰিদৰ্শক দীপিকা চৌধুৰীয়ে । দিনৰ ১২ - ৩০ বজাত অনুষ্ঠিত মুকলি সভাত মুখ্য অতিথি হিচাপে ভাগ লব অসম চৰকাৰৰ শিক্ষামন্ত্ৰী ডাঃ ৰণোজ পেগুৱে । নিদিষ্ট বক্তা হিচাপে অংশ লব সদৌ অসম মহিলা কৰ্মচাৰী সন্থাৰ মুখ্য উপদেষ্টা পূৰবী ফুকনে । সভাত অসম চৰকাৰৰ কেইবাজনো মন্ত্ৰী , বিধায়কৰ লগতে বহু কেইজন বিশিষ্ট ব্যক্তি উপস্থিত থাকিব । উক্ত সভাতে অধিৱেশনৰ লগত সংগতি ৰাখি প্ৰকাশ কৰি উলিওৱা স্মৃতি গ্ৰন্থ " নিঝৰিনী " উন্মোচন কৰা হ'ব । স্মৰ্তব্য যে মৰাণ কণিষ্ঠ মহাবিদ্যালয়ৰ প্ৰাংগনত অনুষ্ঠিত কৰিবলৈ লোৱা অধিৱেশন খনৰ আজি লাইখুটা স্থাপন কৰা হয় । মাংগলিক উৰুলি আৰু ডবা ঘন্টাৰ মাজেৰে লাই খুটা স্থাপন কৰে মৰাণ আৰক্ষী থানাৰ চক্ৰ পৰিদৰ্শক হিতেশ্বৰ বড়োৱে । অনুষ্ঠানত আদৰণী সমিতিৰ বিষয় - ববীয়া সকলৰ উপৰি সাংবাদিক বাছা বৰা , মৰাণ কণিষ্ঠ মহাবিদ্যালয়ৰ অধ্যক্ষ প্ৰশান্ত দত্ত , মৰাণ বাণিজ্য মহাবিদ্যালয়ৰ অধ্যক্ষা আইভিলতাকে ধৰি বহু কেইজন গণ্যমান্য ব্যক্তিয়ে ভাগ লয় ।