১৯৬৪ চনত প্ৰতিষ্ঠা হোৱা নাৰায়ণপুৰ কলেজকে ১৯৬৬ চনৰ ২ আগষ্ট তাৰিখে মাধৱদেৱ মহাবিদ্যালয় নামেৰে নামকৰণ কৰা হয় আৰু ২০১৭ চনৰ ৭ ছেপ্টেম্বৰত অসম চৰকাৰে গৃহীত কৰা মাধৱদেৱ বিশ্ববিদ্যালয় বিধেয়ক,২০১৭ৰ অধীনত মহাপুৰুষ মাধৱদেৱৰ স্মৃতি যুগমীয়া কৰাৰ স্বাৰ্থত মাধৱদেৱ মহাবিদ্যালয়তেই স্থাপন কৰা হয় মাধৱদেৱ বিশ্ববিদ্যালয়। ২০১৯ চনৰ ১৭ জুন তাৰিখে অধ্যাপক ড॰ দিবাকৰ চন্দ্ৰ ডেকাই মাধৱদেৱ বিশ্ববিদ্যালয়ৰ প্ৰথম গৰাকী উপাচাৰ্যৰ কাৰ্য্যভাৰ গ্ৰহণ কৰে। বিশ্ববিদ্যালয় ঘোষণাৰ তিনিটা বৰ্ষৰ পিছত নাৰায়ণপুৰবাসীৰ সপোনে এতিয়া বাস্তৱ ৰূপ পাবলৈ আগবাঢ়িছে। মাধৱদেৱ বিশ্ববিদ্যালয়ত উচ্চ শিক্ষাগ্ৰহণৰ বাবে অপেক্ষাৰত ছাত্র-ছাত্রীৰ বাবে আহিছে ভাল খবৰ। বিশ্ববিদ্যালয়খনত আৰম্ভ হ'ব স্নাতকোত্তৰ শিক্ষাৰ পাঠদান। সাতটা বিভাগত অহা নৱেম্বৰ মাহৰ ২৫ তাৰিখৰ পৰা আৰম্ভ হ'ব পাঠদান। বিশ্ববিদ্যালয়খনৰ কাৰ্যবাহী পৰিষদৰ সিদ্ধান্তৰ পিছতেই এতিয়া উৎফুল্লিত হৈ পৰিছে সকলো।