चिपळूण: महाराष्ट्र भुषण जेष्ठ निरुपणकार आदरणीय डॉ. श्री नानासाहेब धर्माधिकारी यांच्या जनशताब्दी वर्षानिमित डॉ. श्री नानासाहेब धर्माधिकारी प्रतिष्ठान रेवदंडा ता. अलिबाग जिल्हा रायगड यांच्यावतीने जानवले फाटा ते पाटपन्हाळे गडगोबा दुतर्फा रस्ता, शृंगारतळी बाजारपेठेतील दुतर्फा रस्त्याची स्वच्छता व साफसफाई कौंढर काळसुर व पालपणे बैठकीतील श्री सदस्यांच्या वतीने करण्यात आली. डॉ. श्री नानासाहेब धर्माधिकारी प्रतिष्ठानने शृंगारतळी बाजारपेठ स्वच्छतेसाठी दत्तक घेतली आहे. प्रत्येक महिन्याच्या चौथ्या रविवारी सकाळी ७ ते १० वा. या वेळेत शृंगारतळी बाजारपेठेची स्वच्छता श्री सदस्यांकडून करण्यात येणार आहे. प्रथमदर्शनी जागेवर असलेला कचरा व स्वच्छता केल्यानंतर जमा होणारा कचऱ्याची योग्य ती विल्हेवाट करण्यात आली. डॉ. श्री. नानासाहेब धर्माधिकारी प्रतिष्ठानच्या वतीने याआधी अनेकवेळा विविध समाजपयोगी उपक्रम राबविण्यात आले आहेत. यामध्ये रक्तदान शिबीर, आरोग्य शिबीर, वृक्षलागवड, पाणवठे , दिव्यांगाना मदत अशी अनेक उपक्रम प्रत्येक वर्षी प्रतिष्ठानच्या माध्यमातून होत आहेत. या विविध उपक्रमामध्यो हजारो श्री सदस्य सहभागी होतात.